O‘tgan mavsumdan buyon yuqori saviyada o‘ynab kelayotgan Maykl Olise xalqaro tanaffusda ham o‘z iqtidorini yana bir bor namoyish etdi. Shu sabab "Bavariya" uni uzoq muddat jamoada saqlab qolish niyatida.
24 yoshli fransiyalik qanot hujumchisining amaldagi shartnomasi 2029 yilga qadar mo‘ljallangan bo‘lsa-da, myunxenliklar allaqachon uni uzaytirish ustida ish boshlagan.
Bild nashri ma’lumotiga ko‘ra, "Bavariya" Olise bilan kelishuvni yana bir yilga, ya’ni 2030 yilga qadar uzaytirishni rejalashtirmoqda.
Biroq futbolchining bozor qiymati tez sur’atda oshib borayotgani sabab uning vakillari yangi shartnomaga 200 million yevrolik tovon puli bandi kiritilishini talab qilmoqda.
"Bavariya" rahbariyati odatda bunday shartlarga qarshi bo‘ladi. Ammo muzokaralarda hozircha Olise tomoni ustun pozisiyada turgani uchun klub o‘z an’anaviy prinsiplaridan chekinishga majbur bo‘lishi mumkin.
