Avvalroq Bild va nashrning futbol bo‘limi rahbari Kristian Falk "Bavariya" Luis Diasga chap qanotda zaxira va raqobatchi bo‘la oladigan futbolchini sotib olish imkoniyatini o‘rganayotgani haqida xabar bergan edi.

Endi Sky jurnalisti Florian Plettenberg Mia san vier podkastida myunxenliklar haqiqatan ham shunday rejaga ega ekanini tasdiqladi.

Plettenberg ma’lumotiga ko‘ra, "Bavariya" chap qanot pozisiyasini kuchaytirish uchun allaqachon jiddiy ish olib bormoqda. Bu transfer qishda amalga oshadimi yoki yozga qoldiriladimi — hozircha aniq emas.

Shu bilan birga, jurnalist yangi futbolchini olib kelish klubga katta mablag‘ga tushishini ta’kidladi.

Plettenbergning aytishicha, hozir parda ortida olib borilayotgan barcha ishlar "Bavariya"ning yozda yirik transfer amalga oshirishiga qaratilgan.

Myunxenliklar yanvarda haddan tashqari katta xarajat qilishni istamayapti va asosiy mablag‘ni yozgi transferlar oynasi uchun saqlab qolishni rejalashtirmoqda.