«Manchester Yunayted»ning yangi yarim himoyachisi Karlos Baleba hali jamoa safida rasmiy debyut qilmagan bo‘lsa-da, mashg‘ulotlardagi faolligi va ishga munosabati bilan klub xodimlari hamda jamoadoshlarida ijobiy taassurot qoldirmoqda.
Klub ichidagi manbalarning ma’lum qilishicha, kamerunlik futbolchi «Karrington» mashg‘ulotlar bazasida o‘zining yuqori kayfiyati, ijobiy munosabati va g‘ayrati bilan ajralib turibdi.
«Manchester Yunayted» Balebani 2025 yildayoq o‘z safiga qo‘shib olishni maqsad qilgan edi. Biroq 22 yoshli futbolchining «Old Trafford»ga ko‘chib o‘tishi yozgi transferlar davrining so‘nggi qismida amalga oshdi.
Ma’lumotlarga ko‘ra, manchesterliklar xodimlari Balebaning mehnatsevarligi va hazilkashligini yuqori baholamoqda.
Futbolchi jismoniy holatini tezroq yaxshilash va yangi jamoasiga moslashish maqsadida hatto dam olish kunlarida ham mashg‘ulotlar bazasiga kelib, qo‘shimcha shug‘ullangan.
Klub rahbariyati va murabbiylar shtabi kamerunlik yarim himoyachining bunday professional munosabatidan mamnun.
Eslatib o‘tamiz, Baleba o‘tgan mavsumda «Brayton» safida Angliya Premyer-ligasining 31 ta uchrashuvida ishtirok etgan.
Kutilmalarga ko‘ra, 22 yoshli futbolchi jamoaga to‘liq moslashgach, bosh murabbiy Maykl Karrik qo‘l ostida «Manchester Yunayted»ning yarim himoya chizig‘iga jismoniy kuch, harakatchanlik va yuqori shiddat olib kirishi mumkin.
