Ayni paytda «Ash-SHabab» klubida to‘p surayotgan Portugaliya terma jamoasining sobiq qanot hujumchisi Daniel Podense Krishtianu Ronalduning milliy jamoadagi faoliyatini yakunlashi munosabati bilan o‘ziga xos xayrlashuv turnesini tashkil etish g‘oyasini ilgari surdi. Uning taklifiga ko‘ra, Portugaliya terma jamoasi Ispaniya, Braziliya, Italiya va Angliya bilan o‘rtoqlik uchrashuvlarini o‘tkazishi kerak.
«Hozir hamma hamma narsa haqida gapira oladigan, hatto bu borada hech narsani bilmasa ham fikr bildiraveradigan davrda yashayapmiz. Shuning uchun men ham bir taklif bersam bo‘ladi, deb o‘ylayman.
Futboldagi so‘nggi yilida u uchun to‘rtta o‘rtoqlik uchrashuvi tashkil etish kerak. Ispaniya bilan «Santyago Bernabeu»da, Braziliya bilan «Marakana»da, Italiya bilan Turinda va Angliya bilan «Old Trafford»da o‘ynash lozim.
Bu barcha davrlarning eng buyuk futbolchisi bilan xayrlashishning eng yaxshi usullaridan biri bo‘lar edi. U bizga eng yorqin xotiralarni taqdim etgan stadionlarda va xayrlashuv marosimining bir qismi bo‘lishga loyiq mamlakatlar terma jamoalariga qarshi maydonga tushgan bo‘lardi.
Krishtianu bunga loyiq. Futbol bunga loyiq. Biz, muxlislar ham bunga loyiqmiz», — deya Podensening so‘zlarini keltirmoqda Record.
