Madridning "Real" klubi qanot hujumchisi Vinisius Junior "Barselona"ga qarshi bo‘lib o‘tadigan "el-klasiko"ni o‘tkazib yuborishi mumkin.

Braziliyalik futbolchi shanba kuni "Vilyarreal"ga qarshi uchrashuvda maydondan chetlatildi. 26 yoshli vinger golli vaziyatda raqib futbolchisining sochidan tortgani uchun jazolandi. VAR tekshiruvidan so‘ng gol bekor qilindi, Vinisiusga esa to‘g‘ridan-to‘g‘ri qizil kartochka ko‘rsatildi.

Jurnalist Niko Rodriges El Chiringuito dasturida ushbu vaziyatga munosabat bildirib, Vinisiusga jiddiy jazo berilishi kerakligini ta’kidladi.

"Agar Vinisius ikki haftadan keyingi "el-klasiko"da maydonga tusha olsa, bu sharmandalik bo‘ladi. Uni ikki yoki uchta o‘yinga diskvalifikasiya qilishlari shart", — dedi jurnalist.

Eslatib o‘tamiz, "Real" va "Barselona" o‘rtasidagi "el-klasiko" 25 oktyabr kuni Ispaniya La Ligasining 10-turi doirasida bo‘lib o‘tadi. Mazkur bahsga kataloniyaliklar mezbonlik qiladi.

Unga qadar Joze Mourinyu boshchiligidagi madridliklar 18 oktyabr kuni chempionat doirasida "Sevilya"ga qarshi maydonga tushadi.