«Barselona» yarim himoyachisi Frenki de Yong jamoaning asosiy tarkibidagi o‘rnini qaytarib olishda qiyinchiliklarga duch kelishi mumkin. Bu haqda SER Catalunya jurnalisti Luis Flaker ma’lum qildi.
Niderlandiyalik futbolchi so‘nggi vaqtlarda jarohati sababli umumiy mashg‘ulotlardan chetda qolmoqda. Shu bilan birga, «Barselona» yarim himoyasidagi kuchli raqobat uning asosiy tarkibga qaytishini yanada murakkablashtirmoqda.
Luis Flaker Què T’hi Jugues dasturida futbolchining hozirgi holatiga baho berdi.
«Frenki uzoq vaqt maydonga tushmagani, o‘yin darajasining pasaygani va o‘z pozisiyasidagi yuqori raqobatning qurboniga aylandi», — dedi jurnalist.
De Yong tizzasidan olgan jarohatidan tiklanish jarayonini davom ettirmoqda. U yaqinda asosiy jamoa bilan mashg‘ulotlarda qisman ishtirok etishni boshladi.
Kataloniya klubi tibbiy shtabi futbolchining sog‘lig‘ini to‘liq tiklash maqsadida uni mashg‘ulotlarga bosqichma-bosqich qaytarmoqda.
Niderlandiyalik yarim himoyachi joriy mavsumda hali birorta rasmiy uchrashuvda maydonga tushgani yo‘q.
Endilikda De Yong nafaqat jarohatidan to‘liq forig‘ bo‘lishi, balki «Barselona»ning asosiy tarkibidagi o‘rni uchun ham jiddiy raqobat olib borishiga to‘g‘ri keladi.
