«Барселона» ярим ҳимоячиси Френки де Йонг жамоанинг асосий таркибидаги ўрнини қайтариб олишда қийинчиликларга дуч келиши мумкин. Бу ҳақда SER Catalunya журналисти Луис Флакер маълум қилди.

Нидерландиялик футболчи сўнгги вақтларда жароҳати сабабли умумий машғулотлардан четда қолмоқда. Шу билан бирга, «Барселона» ярим ҳимоясидаги кучли рақобат унинг асосий таркибга қайтишини янада мураккаблаштирмоқда.

Луис Флакер Què T’hi Jugues дастурида футболчининг ҳозирги ҳолатига баҳо берди.

«Френки узоқ вақт майдонга тушмагани, ўйин даражасининг пасайгани ва ўз позициясидаги юқори рақобатнинг қурбонига айланди», — деди журналист.

Де Йонг тиззасидан олган жароҳатидан тикланиш жараёнини давом эттирмоқда. У яқинда асосий жамоа билан машғулотларда қисман иштирок этишни бошлади.

Каталония клуби тиббий штаби футболчининг соғлиғини тўлиқ тиклаш мақсадида уни машғулотларга босқичма-босқич қайтармоқда.

Нидерландиялик ярим ҳимоячи жорий мавсумда ҳали бирорта расмий учрашувда майдонга тушгани йўқ.

Эндиликда Де Йонг нафақат жароҳатидан тўлиқ фориғ бўлиши, балки «Барселона»нинг асосий таркибидаги ўрни учун ҳам жиддий рақобат олиб боришига тўғри келади.