«Arsenal» bosh murabbiyi Mikel Arteta jamoasining hujumdagi harakatlariga baho berib, golli vaziyatlardan foydalanish samaradorligini oshirish zarurligini ta’kidladi.

Ispaniyalik mutaxassisning fikricha, londonliklar yetarlicha xavfli vaziyatlar yaratmoqda, ammo ularni gol bilan yakunlash borasida hali ishlash kerak.

«Menimcha, umuman olganda, ishlarimiz ancha yaxshi ketmoqda. Ehtimol, hujumlarni yakunlash sifatini yaxshilashimiz kerakdir.

Terma jamoalar o‘yinlari munosabati bilan yuzaga kelgan tanaffusga qadar biz avvalgi barcha mavsumlarga qaraganda ko‘proq golli vaziyatlar yaratdik.

Keyin «Brayton»ga 0:3 hisobida mag‘lub bo‘ldik. Shundan so‘ng «Lids»ga qarshi uchrashuv bo‘lib o‘tdi va u butunlay boshqacha sharoitda kechdi.

Biz hujumlarni yakunlash uchun qulay pozisiyalarni egallayapmiz. Endi hal qiluvchi vaziyatlarda aniqroq harakat qilishimiz va hujumlarni ko‘proq gol bilan yakunlashimiz zarur», — dedi Arteta.

Eslatib o‘tamiz, «Arsenal» Angliya Premyer-ligasidagi so‘nggi uchrashuvida «Lids»ni 2:1 hisobida mag‘lub etdi.

Londonliklar navbatdagi bahsini 13 oktyabr kuni UYEFA Chempionlar ligasi doirasida Fransiyaning «Lill» klubiga qarshi o‘tkazadi.