Saudiya Arabistonining "An-Nasr" klubi hujumchisi Krishtianu Ronaldu O‘zbekistonning "Neftchi" jamoasiga qarshi uchrashuvdan so‘ng Saudiya Arabistoni haqida fikr bildirdi.

Dushanba kuni bo‘lib o‘tgan bahsda "An-Nasr" Farg‘ona klubini 3:1 hisobida mag‘lub etdi. Portugaliyalik yulduz uchrashuvda gol muallifi bo‘ldi va faoliyati davomidagi gollari sonini 981 taga yetkazdi.

Mazkur g‘alabadan keyin "An-Nasr" matbuot xizmati ijtimoiy tarmoqlarda 41 yoshli futbolchining Saudiya Arabistoniga munosabatini aks ettiruvchi qisqa iqtibosini e’lon qildi.

"Men portugaliyalikman, ammo o‘zimni Saudiya Arabistoni Qirolligining ham bir qismi deb bilaman", — dedi Ronaldu.

Endi "An-Nasr" Saudiya Arabistoni Pro-ligasi doirasidagi navbatdagi uchrashuvga tayyorgarlik ko‘radi.

Ar-Riyod klubi 15 oktyabr, payshanba kuni safarda Jiddaning "Al-Ahli" jamoasiga qarshi maydonga tushadi.

Ayni paytda "An-Nasr" Saudiya Arabistoni chempionati turnir jadvalida 3-o‘rinni egallab turibdi. Jamoa peshqadam "Al-Hilol"dan ikki ochko ortda qolmoqda.