Ispaniya futbol hakamlari korpusida Madridning «Real» klubi bilan munosabatlar tobora keskinlashib borayotganidan jiddiy xavotir bildirilmoqda.
Cadena SER nashrining xabar berishicha, Ispaniya Hakamlar texnik qo‘mitasi (CTA) vakillari barcha darajalarda «Real»ning La Liga hakamlariga nisbatan keskin bayonotlari va tanqidiy munosabatidan tashvishda.
Ayniqsa, joriy mavsumda tribunalarda, ommaviy axborot vositalarida va klubning rasmiy media platformalarida hakamlarga nisbatan bosim kuchaygani qo‘mita vakillarini xavotirga solmoqda.
Shu bilan birga, hakamlar korpusida yaqinlashib kelayotgan «el-klasiko» arafasida vaziyat yanada keskinlashishi mumkinligi taxmin qilinmoqda.
Ma’lumot uchun, «Real» va «Barselona» o‘rtasidagi navbatdagi to‘qnashuv 25 oktyabr kuni Ispaniya La Ligasining 10-turi doirasida bo‘lib o‘tadi.
Manbaga ko‘ra, Hakamlar texnik qo‘mitasi «Real» bilan munosabatlardagi keskinlikni yumshatish va o‘zaro muloqotni tiklashga harakat qilmoqda.
Biroq madridliklar vakillari so‘nggi bir necha oy davomida qo‘mita tomonidan tashkil etilgan yig‘ilishlarning birortasida ishtirok etmagan. Bu esa tomonlar o‘rtasidagi munosabatlarni yaxshilash yo‘lidagi sa’y-harakatlarni murakkablashtirmoqda.
