Londonning «Arsenal» klubi faxriy prezidenti Ken Frayer 92 yoshida vafot etdi. Bu haqda Angliya klubi o‘zining rasmiy sayti orqali ma’lum qildi.
Frayerning «Arsenal» bilan bog‘liq faoliyati 1945 yilda, u atigi 11 yoshda bo‘lgan paytda boshlangan. Dastlab u klubning kirish eshigidan chipta kassasiga xabarlar yetkazish bilan shug‘ullangan.
Shundan so‘ng u butun umrini «Arsenal»ga bag‘ishladi. Klub tizimida turli lavozimlarda faoliyat yuritgan Frayer 1983 yilda boshqaruvchi direktor etib tayinlandi.
U rahbarlik qilgan davrda «Arsenal» Angliyaning yetakchi klublaridan biriga aylandi. Jorj Grem va keyinchalik Arsen Venger bosh murabbiyligida jamoa katta muvaffaqiyatlarga erishdi.
Shuningdek, Frayer klub tarixidagi eng muhim loyihalardan biri — «Arsenal»ning afsonaviy «Xayberi» stadionidan zamonaviy «Emireyts» arenasiga ko‘chish jarayonida ham muhim rol o‘ynadi.
2020 yilda u ijrochi direktor lavozimini tark etib, klubning umrbod faxriy prezidenti etib tayinlandi.
Kundalik boshqaruv ishlaridan chetlashganiga qaramay, Frayer «Arsenal» hayotida faol ishtirok etishda davom etdi. U o‘yinlar boshlanishidan ancha avval stadionga kelib, klub faoliyati bilan bog‘liq turli masalalarga vaqt ajratardi.
Frayer umrining so‘nggi yillarida «Arsenal»ning yana Angliya futboli cho‘qqisiga qaytganiga ham guvoh bo‘ldi. Londonliklar 22 yillik tanaffusdan so‘ng Angliya Premyer-ligasi chempionligini qo‘lga kiritdi.
«Ushbu og‘ir damlarda Ken Frayerning oila a’zolari va ko‘plab yaqin do‘stlariga hamdardlik bildiramiz», — deyiladi «Arsenal»ning rasmiy bayonotida.
Ken Frayer «Arsenal»da 81 yil davomida faoliyat yuritib, klub tarixida o‘chmas iz qoldirgan shaxslardan biri sifatida yodda qoladi.
