Germaniyaning «Leypsig» klubi UEFA Chempionlar ligasi umumiy bosqichi 2-turida Niderlandiyaning PSV jamoasini o‘z maydonida 1:0 hisobida mag‘lub etdi.
Uchrashuvdagi yagona gol 75-daqiqada kiritildi. Mezbonlar hujumchisi Brayan Gruda raqib darvozasini ishg‘ol qilib, jamoasiga muhim g‘alabani taqdim etdi.
Bahs davomida PSV hisobni o‘z foydasiga o‘zgartirish uchun bir necha qulay imkoniyatga ega bo‘ldi. Jumladan, 19-daqiqada mehmonlar yarim himoyachisi Ivan Perishich penaltini aniq amalga oshira olmadi.
81-daqiqada esa PSV himoyachisi Armando Obispo to‘pni darvozaga yo‘lladi. Biroq VAR aralashuvidan so‘ng ofsayd qayd etildi va gol bekor qilindi.
Shu tariqa, «Leypsig» minimal hisobda g‘alaba qozonib, Chempionlar ligasining joriy mavsumidagi dastlabki uch ochkosini qo‘lga kiritdi.
Ushbu natijadan so‘ng Germaniya klubi 3 ochko bilan umumiy bosqich turnir jadvalida 20-o‘ringa ko‘tarildi. Hisobida 1 ochko bo‘lgan PSV esa 25-pog‘onadan joy olgan.
Chempionlar ligasining navbatdagi turida «Leypsig» 21 oktyabr kuni safarda Madridning «Real» klubiga qarshi maydonga tushadi. PSV esa 20 oktyabrda Portugaliyaning «Portu» jamoasi mehmoni bo‘ladi.
Yevropa chempionlar ligasi. Umumiy bosqich. 2-tur.
14 oktyabr, 00:00. «Red Bull Arena» (Leypsig)
«RB Leypsig» — «PSV» — 1:0
Gol: Gruda, 75 (1:0).
Amalga oshirilmagan penalti: Perishich (19).
«RB Leypsig» tarkibi: Vandervordt, Orban, Lyukeba, Raum, Baku (Klostermann, 86), Banzuzi (Zayvald, 86), El-Aynaui, Nkunku, Nusa, Gruda (Rays, 76), Romulo (Gomis, 61).
«PSV» tarkibi: Kovarj, Gertreyda (Gaserovski, 77), Obispo, Kostich (Flamingo, 77), Dest, Mauro Junior, Sano, Til, van Bommel (Bro Xansen, 84), Perishich, Meynans (Santos, 84).
Sariq kartochkalar: Nusa (81) — Dest (43), Obispo (85).
