Ispaniyada "Barselona" va "Xetafe" o‘rtasidagi La Liga uchrashuvini boshqargan hakam Xesus Xil Mansanoning o‘yindan keyingi so‘zlari keng muhokama qilinmoqda.
O‘tgan shanba kuni bo‘lib o‘tgan bahs kataloniyaliklarning 3:0 hisobidagi g‘alabasi bilan yakunlangan edi.
Madrid Universal nashrining xabar berishicha, uchrashuvning final hushtagi yangraganidan so‘ng Xil Mansano "Barselona" bosh murabbiyi Xans-Diter Flikka murojaat qilgan.
"Tabriklayman! Sizlarga Chempionlar ligasida muvaffaqiyat tilayman. O‘yiningiz chorshanba kunimi yoki seshanbada?" — deb so‘ragan hakam.
"Seshanba kuni", — deya javob qaytargan germaniyalik mutaxassis.
"Sizlarga omad tilayman", — degan Xil Mansano.
Manbaning qo‘shimcha qilishicha, ispaniyalik hakam "Barselona" darvozaboni Joan Garsiyadan ham tizzasining holati haqida so‘ragan.
Eslatib o‘tamiz, Flik boshchiligidagi "Barselona" Chempionlar ligasi doirasida "Galatasaroy"ni 4:1 hisobida mag‘lub etdi.
Kataloniyaliklar navbatdagi uchrashuvini 17 oktyabr, shanba kuni Ispaniya chempionati doirasida "Betis"ga qarshi o‘tkazadi.
