Futbol bo‘yicha O‘zbekiston Superligasining 24-turidan o‘rin olgan markaziy uchrashuvlardan biri Namanganda bo‘lib o‘tadi. Unda mahalliy "Navbahor" klubi Toshkentning "Paxtakor" jamoasini qabul qiladi.
17 oktyabr kuni bo‘lib o‘tadigan ushbu bahs nafaqat turnir jadvalidagi ahamiyati, balki ikki klub o‘rtasidagi ko‘p yillik raqobat tarixi bilan ham e’tiborga molik.
71 uchrashuvda ustunlik "Paxtakor" tomonida
O‘zbekiston chempionatining doimiy ishtirokchilari hisoblangan "Navbahor" va "Paxtakor" shu kunga qadar milliy chempionat doirasida 71 marta o‘zaro to‘qnash kelgan.
Mazkur bahslarning 42 tasida poytaxtliklar g‘alaba qozongan bo‘lsa, 15 uchrashuvda namanganliklar zafar quchgan. Qolgan 14 ta o‘yinda durang natija qayd etilgan.
To‘plar nisbati ham "Paxtakor" foydasiga — 114:59. O‘zaro uchrashuvlarda toshkentliklar 140, "Navbahor" esa 59 ochko jamg‘argan.
Eng yirik g‘alabalar: 7:0 va 5:2
Ikki klub o‘rtasidagi raqobat tarixidagi eng yirik hisob 2009 yilda qayd etilgan. O‘shanda Toshkentda bo‘lib o‘tgan uchrashuvda "Paxtakor" raqibini 7:0 hisobida mag‘lub etgan.
"Navbahor"ning poytaxt klubi ustidan qozongan eng yirik g‘alabasi esa 2024 yilga to‘g‘ri keladi. Namanganda o‘tkazilgan bahsda "lochinlar" 5:2 hisobida zafar quchgan.
Namangandagi o‘yinlarda kuchlar deyarli teng
Jamoalar shu kunga qadar Namanganda 35 marta ro‘baro‘ kelgan. Mezbonlar 13 ta uchrashuvda g‘alaba qozongan bo‘lsa, "Paxtakor" 14 marta muvaffaqiyatga erishgan. Yana 8 ta bahsda g‘olib aniqlanmagan.
Namangandagi o‘zaro o‘yinlarda to‘plar nisbati 42:37 hisobida poytaxtliklar foydasiga.
Bu raqamlar "Navbahor" o‘z maydonida "Paxtakor"ga jiddiy qarshilik ko‘rsatib kelayotganini tasdiqlaydi.
Birinchi davrada "Navbahor" g‘alaba qozongan
Joriy mavsumning birinchi davrasida Toshkentda bo‘lib o‘tgan uchrashuv "Navbahor"ning 2:0 hisobidagi g‘alabasi bilan yakunlangan edi.
O‘sha bahsda Katulondi Kati 47-daqiqada hisobni ochgan bo‘lsa, 65-daqiqada Ruslanbek Jiyanov penaltidan ikkinchi golni kiritgan.
Shu tariqa, namanganliklar birinchi davrada poytaxt klubini safarda mag‘lub etishga muvaffaq bo‘lgan.
Chempionlik poygasi uchun muhim bahs
Ayni paytda "Paxtakor" 23 uchrashuvdan so‘ng 52 ochko bilan Superliga turnir jadvalida peshqadamlik qilmoqda.
"Navbahor" esa 45 ochko jamg‘arib, uchinchi o‘rinda bormoqda. Namanganliklar g‘alaba qozongan taqdirda peshqadam bilan oradagi farqni to‘rt ochkogacha qisqartirish imkoniyatiga ega bo‘ladi.
"Paxtakor" uchun esa mazkur bellashuv chempionlik poygasidagi mavqeini mustahkamlash nuqtai nazaridan muhim ahamiyat kasb etadi.
Superliga. 24-tur
17 oktyabr, 19:00
"Navbahor" — "Paxtakor"
Stadion: "Markaziy", Namangan.
Navbatdagi uchrashuv ikki jamoa o‘rtasidagi milliy chempionat doirasidagi 72-to‘qnashuv sifatida tarixdan joy oladi.
