Dzyudo bo‘yicha O‘zbekiston terma jamoasi a’zosi, Olimpiada va Osiyo chempioni, Osiyo o‘yinlari g‘olibi, Jahon chempionati sovrindori Diyora Keldiyorova (-52 kg) Qozog‘istonning Aqtau shahrida o‘tkazilgan xalqaro turnirda oltin medalni qo‘lga kiritdi. O‘zbekistonlik sportchi ushbu g‘alabasidan so‘ng jurnalistlarga intervyu berdi.

“Ochig‘ini aysam, Parij Olimpiadasidan oldingi sport formamga to‘liq qaytdim deb ayta olmayman. O‘shanda men boshqacha edim. Hozir men mutlaqo boshqa, yangi Diyoraman — ona sifatida yanada nazokatliman. Shunga qaramay, o‘zimni juda yaxshi his qilyapman. Shunchaki dzyudodan zavq olishni istayman. Men dzyudoni yaxshi ko‘raman, u bilan yashayman va o‘z ishimdan qanchalik zavq olayotganim men uchun juda muhim. Qizim uchun eng muhimi — men uning yonida bo‘lishim, uni bag‘rimga bosishim. Unga faqat ona kerak. Hozircha u mening qanday sportchi ekanligimni tushunmaydi. Ehtimol, vaqti kelib bularning barchasini anglab yetar”, deydi Keldiyorova.

Ma’lumot uchun, 17 oktyabr kuni Qozog‘istonning Aqtau shahrida o‘tkazilgan xalqaro turnirda Diyora Keldiyorova barcha raqiblarini (jumladan, finalda ozarbayjonlik Farida Mirzayevani) ippon bahosi bilan mag‘lub etib, oltin medalni qo‘lga kiritdi. Bu unga jahon reytingi uchun 100 ochko taqdim etdi.

Eslatib o‘tamiz, sportchi 2024 yilgi Parij Olimpiadasida (-52 kg) oltin medalni qo‘lga kiritgach, farzandli bo‘lgani sababli yirik turnirlarda ishtirok etmayotgan edi.