Fransiya chempionatining 8-turidan o‘rin olgan «PSJ» va «Lion» o‘rtasidagi uchrashuv belgilangan muddatda o‘tkazilmasligi mumkin. Bunga mamlakatda rejalashtirilgan ommaviy norozilik namoyishlari va xavfsizlik bilan bog‘liq ehtimoliy muammolar sabab bo‘lmoqda.
L’Équipe nashrining xabar berishicha, Parij polisiyasi prefekturasi Fransiya Professional futbol ligasiga (LFP) murojaat qilib, 25 oktyabr, yakshanba kuni bo‘lib o‘tishi kerak bo‘lgan bahsni boshqa sanaga ko‘chirish imkoniyatini ko‘rib chiqishni so‘ragan.
Ma’lumotlarga ko‘ra, Fransiyada dam olish kunlari yangi norozilik aksiyalari o‘tkazilishi rejalashtirilgan. Bir hafta avval mamlakatda bo‘lib o‘tgan namoyishlar davomida to‘qnashuvlar va talonchilik holatlari kuzatilgan edi.
Polisiya dastlab mazkur masalani Liga rahbariyati bilan og‘zaki muhokama qilgan. Payshanba kuni esa uchrashuvni qoldirish yuzasidan rasmiy so‘rov yuborilgan.
Biroq LFP hozircha bahsni boshqa sanaga ko‘chirish uchun yetarli asos yo‘qligini bildirib, bunday qarorni mustaqil ravishda qabul qilishdan bosh tortgan.
Liga o‘z pozisiyasini tushuntirar ekan, yakshanba kuni «Stad de Frans» stadionida o‘tkazilishi rejalashtirilgan Amerika futboli milliy ligasi (NFL) doirasidagi «Nyu-Orlean Seynts» va «Pittsburg Stilerz» uchrashuvi bekor qilinmaganini misol sifatida keltirgan.
Shu bilan birga, Fransiya Professional futbol ligasi hamda «PSJ» va «Lion» klublari tegishli davlat organlari rasmiy qaror qabul qilgan taqdirda, unga bo‘ysunishga tayyor ekanini ma’lum qilgan.
Agar uchrashuvni qoldirishga to‘g‘ri kelsa, uni 26 oktyabr, dushanba kuni o‘tkazish eng ehtimoliy variant sifatida ko‘rilmoqda. Chunki LFP reglamentiga ko‘ra, bu bahsni tashkil etish mumkin bo‘lgan eng yaqin sana hisoblanadi.
