Франция чемпионатининг 8-туридан ўрин олган «ПСЖ» ва «Лион» ўртасидаги учрашув белгиланган муддатда ўтказилмаслиги мумкин. Бунга мамлакатда режалаштирилган оммавий норозилик намойишлари ва хавфсизлик билан боғлиқ эҳтимолий муаммолар сабаб бўлмоқда.

L’Équipe нашрининг хабар беришича, Париж полицияси префектураси Франция Профессионал футбол лигасига (LFP) мурожаат қилиб, 25 октябрь, якшанба куни бўлиб ўтиши керак бўлган баҳсни бошқа санага кўчириш имкониятини кўриб чиқишни сўраган.

Маълумотларга кўра, Францияда дам олиш кунлари янги норозилик акциялари ўтказилиши режалаштирилган. Бир ҳафта аввал мамлакатда бўлиб ўтган намойишлар давомида тўқнашувлар ва талончилик ҳолатлари кузатилган эди.

Полиция дастлаб мазкур масалани Лига раҳбарияти билан оғзаки муҳокама қилган. Пайшанба куни эса учрашувни қолдириш юзасидан расмий сўров юборилган.

Бироқ LFP ҳозирча баҳсни бошқа санага кўчириш учун етарли асос йўқлигини билдириб, бундай қарорни мустақил равишда қабул қилишдан бош тортган.

Лига ўз позициясини тушунтирар экан, якшанба куни «Стад де Франс» стадионида ўтказилиши режалаштирилган Америка футболи миллий лигаси (NFL) доирасидаги «Нью-Орлеан Сэйнтс» ва «Питтсбург Стилерз» учрашуви бекор қилинмаганини мисол сифатида келтирган.

Шу билан бирга, Франция Профессионал футбол лигаси ҳамда «ПСЖ» ва «Лион» клублари тегишли давлат органлари расмий қарор қабул қилган тақдирда, унга бўйсунишга тайёр эканини маълум қилган.

Агар учрашувни қолдиришга тўғри келса, уни 26 октябрь, душанба куни ўтказиш энг эҳтимолий вариант сифатида кўрилмоқда. Чунки LFP регламентига кўра, бу баҳсни ташкил этиш мумкин бўлган энг яқин сана ҳисобланади.