Кириш Регистрация
28/03 19:00 Динамо - Металлург
29/03 19:00 ОКМК - Бунёдкор
29/03 19:15 Қизилқум - Локомотив

Блог

Лутфулло Турсунов

Ла Лига бўйича эксперт

Ла Лига “қишки уйқу”га кетди

Баҳо:
+0; -0
LA-LIGA-REVIEW-WEEK-200086016-22-52

16-тур ўйинларидан сўнг Испания чемпионати қишки таътилга чиқди. Бу сафарги танаффус одатдагидан анча чўзилади ва 17-тур ўйинларига келгуси йилнинг 6 январида старт берилади. Оралиқ танаффус чемпионат, умуман испан футболи атрофидаги турли воқеа-ҳодисалар сарҳисобини қилишга имкон беради. Бу йўналишдаги дастлабки таҳлилимиз Ла Лига 2016/17 йилги мавсумининг қишки танаффусгача бўлган даврига бағишланади.

Турнир жадвали

Демак, турнир жадвалидан бошлаймиз. Мусобақада “Реал Мадрид” клуби яққол пешқадамлик қилмоқда. Зайниддин Зидан шогирдлари давра ўрталарида бир неча бор дуранг қайд этиб, мухлисларини бироз хавотирга солган бўлса-да, кейинчалик вазиятни ўнгладилар ва керакли очколарни тўплаб олдилар.

Мадридликларнинг яққол етакчига айланишига “Барселона” ҳам йўл қўйиб берди. Луис Энрике жамоаси аввалги йиллардагидан анча кўп очко йўқотиб, рақибини олдинга ўтказиб юборди.

Бу жамоаларнинг доимий рақобатчиси “Атлетико” эса бу мавсумда мутлақо ўзига ўхшамаяпти.

ЖамоаЎйинҒалабаДурангМағлубиятТ-НОчко
1 Реал Мадрид 15 11 4 0 40-14 37
2 Барселона 16 10 4 2 41-16 34
3 Севилья 16 10 3 3 32-21 33
4 Вильярреал 16 8 5 3 25-11 29
5 Реал Сосьедад 16 9 2 5 28-21 29
6 Атлетико 16 8 4 4 29-14 28
7 Атлетик Бильбао 16 8 2 6 22-19 26
8 Эйбар 16 6 5 5 22-20 23
9 Эспаньол 16 5 7 4 20-22 22
10 Лас-Палмас 16 5 6 5 26-24 21
11 Малага 16 5 6 5 25-26 21
12 Алавес 16 5 6 5 15-17 21
13 Сельта 16 6 3 7 25-31 21
14 Бетис 16 5 3 8 18-29 18
15 Депортиво 16 4 4 8 22-27 16
16 Леганес 16 4 4 8 13-27 16
17 Валенсия 15 3 3 9 21-29 12
18 Спортинг Хихон 16 3 3 10 17-33 12
19 Гранада 16 1 6 9 14-33 9
20 Осасуна 16 1 4 11 13-34 7

Етакчи

“Қироллик клуби” ўзгарди, Зидануни ўзгартирди. Жамоа характери ўзгарди, агар аввалги мураббийларда “Реал” аксар ҳолларда сўнгги дақиқаларда ғалабани қўлдан бой бериб қўйган бўлса, ҳозир бунинг мутлақо тескариси. Мадридликларнинг сўнгги дақиқалардаги голлари ҳисобига муҳим ғалабаларни қўлга киритилаётгани ҳақида ушбу блогдаги мақолада батафсил ҳикоя қилган эдик.

Муҳим ўзгаришлардан яна бири жамоа фақат етакчиларга таяниб қолаётгани йўқ. Зарур бўлганда Мората, Асенсио, Мариано каби ёшлар ҳам ўзларини кўрсата олишяпти. Жамоанинг деярли ҳар бир аъзоси рақиб дарвозаси олдида хавф туғдира оляпти.
“Реал” мавсум давомида керакли балансни ушлаб тура оляпти. Бунда Зиданнинг хизмати катта. Жамоада етакчи футболчиларнинг жароҳат олиши ҳам мадридликларга жиддий муаммо туғдиргани йўқ. Сабаби мураббийлар штаби мавжуд ресурсдан унумли фойдаланиб, мос тактик ишланмани таклиф эта оляпти. Каземиро жароҳат олганида майдон марказида таянч ярим ҳимоячисиз ўйналди ва қанот футболчилари фаоллиги ҳисобига жамоавий прессинг қўлланилди. Таянч ярим ҳимоячиси майдонга қайтганида эса бироз бошқача усулдан фойдаланилди.

Албатта, “Барселона” ва “Атлетико”нинг нисбатан бўш иштироки ҳам “Реал”нинг яққол пешқадам бўлиб олишига замин яратди. Бу икки жамоа дастлабки 16 турдан кейин сўнгги 4 йилга қараганда энг кам очко тўплашди. Шу ҳолат ҳам “Реал”га сезиларли устунлик берди.

“Реал” мухлисларини хавотирга соладиган бир жиҳат бор: Зидан – Карло Анчелоттининг шогирди. Анчелоттининг жамоалари эса бир мавсумнинг икки даврасини икки хил даражада ўтказади.

Таъқибчи

Луис Энрикеўз ротациялари билан ном қозонган. Ҳар сафар мавсумнинг биринчи яримини тушунарсиз ўзгартиришлари билан ўтказади. Бунга кўпчилик кўникиб ҳам қолган. Аммо бу йил у шунчаки ротация ўтказмади. У кўпроқ ўзи учун янгиланган идеал ярим ҳимоя тандемларини қидирди. Ёши ўтиб бораётган Иниеста ҳамда охирги вақтларда ўйини бироз пасайган Ракитичга муносиб рақобатчи тайёрлаш мақсадида ёзги трансфер ойнасида Гомеш ва Денис Суарес харид қилинди. Таркибда Рафиня ва Арда ҳам бор эди. Лучо шу футболчилардан энг идеал вариант танлашга уринди. Аммо бу уринишлар ҳали натижа бергани йўқ. Аксинча, жамоа айнан ярим ҳимоядаги оқсашлар туфайли аксар баҳсларда ўз ўйинини топа олмади ва муҳим очколарни йўқотди.

Месси ва Иниестанинг жароҳатланиши ҳам ўз таъсирини ўтказди. Айниқса, майдон марказида тартибни юзага келтира олмаётган бир вақтда Андреснинг жароҳат олиши, жамоани анча қийин аҳволга солиб қўйди. Сардор тузалиб қайтгач, каталонияликлар ўйини ҳам ўзгарди. Аммо мураббийнинг мукаммал таркиби ҳали юзага келгани йўқ.

Энрикенинг “Барселона”си терма жамоалар йиғинидан кейин ўзини йўқотиб қўйиш одатини ҳали ҳам бартараф эта олмаяпти. Аввалги мавсумда шу муаммо туфайли чемпионлик бой беришига бир баҳя қолганди. Бу сафар ҳам айнан ФИФА кунларидан сўнг “Барса” кўп очко йўқотди. Ҳали Энрике баҳордаги ФИФА кунларини ҳам бошидан ўтказиши лозим.

Учинчи ўрин учун кимлар курашади?

Ҳозирча “Севиля” бу ўринда ишонч билан кетяпти. Мавсум стартида эса “Атлетико”га учликнинг бири сифатида қаралган эди. Симеоне жамоаси у бошқарувидаги энг ёмон мавсумини ўтказяпти. Муаммо бир қанча сабаблар йиғиндисидан пайдо бўлди.

Биринчидан, “Атлетико” деярли бир хил таркиб билан бир неча йилдан буён юқори даражада ўйин кўрсатиб келяпти. Бундай ҳолатда жисмоний ва функционал ҳолатдаги пасайиш бир кун бошга тушиши аниқ эди. Гризманн ўтган йиллардагидекмас, ҳимояда тартибсизлик юзга келган, ярим ҳимояда Коке ва Саул ўз даражасида ўйин кўрсата олмаяпти...

Иккинчидан, Симеоне жамоа ўйинидаги эҳтимолий пасайишни ҳисобга олиб, ёзда бир қатор футболчиларни харид қилди. Янги футболчилар ҳисобига жамоа ўйинини бироз ўзгартириб, кўпроқ ҳужумкорликка урғу беришга уринди. Бироқ бу ўзгаришлар ҳали самара бергани йўқ.

Учинчидан, аргентиналик мураббийнинг жамоани тарк этиши ҳақидаги гап-сўзлар кўпая бошлади. Диегонинг ўзи ҳам буни инкор қилмади. Ҳатто унинг келажакда бошқарадиган жамоаси ҳам аниқ – Италиянинг “Интер” клуби. Фақат қачон жамоани алмаштириши номаълум. Бу ҳолат мадридликларнинг руҳий ҳолатига салбий таъсир кўрсатди.

Бу орада учинчи поғона учун курашда рақобат кучайди. Сампаоли ўз ғояларини сингдириб бўлгач, “Севилья” кескин сакраш қилди. “Вильярреал” ҳам барқарор ўйин кўрсатишда давом этяпти. Сан-Себастьянда баскларнинг янги истеъдодли авлоди етишиб чиқяпти. Демак, юқори поғоналар учун кураш ҳали янада авж олади.

Тўпурарлар

Ла Лига тўпурарлари баҳсида ҳам кураш қизғин кечмоқда. Одатий Суарес, Месси, Роналду курашига “Сельта” ҳужумчиси Яго Аспас ҳам қўшилган.

ИСМ-ШАРИФИЖАМОАГОЛПЕНАЛЬТИЖАМИ
1 Луис Суарес Барселона 12 0 12
2 Лионель Месси Барселона 10 2 12
3 Яго Аспас Сельта 8 2 10
4 Криштиану Роналду Реал Мадрид 7 3 10
5 Педро Леон Эйбар 7 0 7
6 Сандро Рамирес Малага 7 0 7
7 Рубен Кастро Бетис 6 1 7
8 Виллиан Жозе Реал Сосьедад 5 2 7
9 Бруно Сориано Вильярреал 4 3 7
10 Янник Феррейра Карраско Атлетико 6 0 6

Бонус

 gEusB.jpg

Сўнгги уч йил ичида Европа клублари иштирок этган 12 халқаро турнирнинг барчасида Ла Лига вакиллари - "Реал", "Барселона" ва "Севилья" шоҳсупага кўтарилган.

 

 

Киритилган сана: 22.12.2016 16:04. Ўкилди: 5611 марта.

Фикр билдиринг

ФИКР БИЛДИРИШ УЧУН РЕГИСТРАЦИЯДАН УТИШ КЕРАК!

Билдирилган фикрлар:


FARUXMESSI
Сана: 22.12.2016 17:08. FARUXMESSIга ёзиш
+0; -0
Hudo Xoxlasa Barca chempion

Ушбу фикрга жавобан

МУАЛЛИФНИНГ БОШҚА МАҚОЛАЛАРИ

 

БЛОГГЕРЛАР

Асосий сахифа
© STADION.UZ
Гувоҳнома №0917. Берилган санаси: 02.12.2013. Муассис: «OSIYO KABEL» МЧЖ. Бош муҳаррир: Бўронов Олимхўжа Азимхўжа ўғли. Таҳририят манзили: 100057, Тошкент шаҳри, Уста Ширин 125. E-mail: admin@stadion.uz
Барча ҳуқуқлар ҳимояланган. Сайт материалларидан тўлиқ ёки қисман фойдаланилганда веб-сайт манзили кўрсатилиши шарт.
Блогдаги материаллар учун блог эгаси, хабарлар остидаги фикрлар учун фойдаланувчининг ўзи жавобгар.