"Реал" кетма-кет 3та ўйиндан иборат ғалабасиз сериясига чек қўйди. Мадридликлар ўз майдонларида "Леванте" устидан ишончли тарзда ғалаба қозонишди.
Айниқса, биринчи бўлимда Анчелотти шогирдлари тажовузкор ўйин кўрсатишди. Баҳснинг 18-дақиқасида Бензема ўнг қанотдан жарима майдончасига кирди ва нариги томонга узатма берди. Роналду қайчи услубида зарба берганидан сўнг ҳимоячи чизиқ устида бош билан тўпни қайтарди. Қайтган тўпни Бэйл даврозага жойлади. Орадан 7 дақиқа ўтиб Роналду яқин масофадан йўллаган зарба дарвоза устунига тегиб қайтди. Шунга қарамай, мезбонларнинг иккинчи голи камида 50 фоизга Роналдуники десак бўлади. Жарима тўпи ўнг қанотдан жарима майдончасига кирган Карвахалга етказилди ва Даниэль тўпни зарба бериш учун қулай вазиятда очилган Роналдуга етказди. Ўткир бурчак остида берилган Криштианунинг зарбаси Бэйлнинг оёғига тегиб, дарвоза тўрига бориб тушди.
Иккинчи бўлимни "Реал" анча хотиржам ўтказди. Меҳмонлар гол уриш учун ҳеч қандай имкониятга эга бўлишмади. Бенземанинг чиройли услубда йўллаган зарбаси эса "Леванте" дарвозаси тўсини титратди...
"Реал Мадрид" "Барселона" билан 1 очколик фарқни сақлаб турибди.
Реал Мадрид – Леванте 2:0 (2:0, 0:0)
Голлар: 1:0 – 18 Бэйл, 2:0 – 40 Бэйл.
Реал Мадрид – Навас, Рамос, Карвахаль, Пепе, Марсело, Иско (Хесе, 69), Лукас Силва, Бэйл, Модрич (Ильярраменди, 78), Бензема (Эрнандес, 82), Роналду.
Леванте – Мариньо, Тоньо, Наварро, Рамис, Лопес, Шуметра (Эль-Жар, 59), Симао, Камараса, Моралес (Гарсия, 59), Барраль, Уче (Касадесус, 75).
Огоҳлантиришлар: Модрич (30), Рамос (85).
