Москванинг ЦСКА клуби президенти Евгений Гинер championat.com сайтига берган интервьюсида армиячилар Сардор Рашидов билан қизиққанлиги ҳақида саволга жавооб берди.

— ЦСКА қишда "Бунёдкор" ва Ўзбекистон терма жамоаси ярим ҳимоячиси Сардор Рашидов билан қизиққани ростми? Рост бўлса, нима учун шартнома имзоланмади?
— Бу ҳам мен сизга айтиб бермоқчи бўлган воқеага ўхшаш вазият. Бир куни олдимга бир танишим келди-да: "Исроилда яхши ҳужумчи бор, синаб кўрмайсанми?", - деди. Мен селекционерларимизга топшириқ бердим ва улар бу борада иш бошлашди. Улар бир мутахассисдан ўша футболчи ҳақидаги фикрини сўрашган. Орадан бироз вақт ўтганидан кейин менга савол беришяпти: "Футболчини оласизми?". Мен эса: "Қайси футболчи? Йўқ", - дея жавоб берди. Улар эса бунга жавобан: "Қанақасига? Агент у билан учрашган ва унинг айтишича футболчи бир оёғи билан ЦСКАда экан, фақат ойлик маошни келишиш қолибди-ку!", дейишган. Тасаввур қиляпсизми? Шунинг учун бир нарсани тушуниш керак: селекционерлар жуда кўп футболчиларни кузатишади, баъзида у ҳақида мутахассисларнинг фикрлари билан қизиқишади. Натижада эса ЦСКА футболчи билан қизиқаётган бўлиб чиқади!