"Пахтакор" ҳам ўзбек клубларининг ОЧЛ 3-туридаги "анъана"сини давом эттирди ва мусобақадаги дастлабки мағлубиятини тан олди.
"Пахтакор" кетма-кет 3та ўйинда ғалаба қозона олмагандан кейин Самвел Бабаян бу сафар бошқача ўйин кўрсатишга ваъда берганди. Аммо "Ал-Айн"га қарши бугунги ўйин ҳам "шерлар"нинг охирги 3та ўйинидан фарқ қилмади. Айниқса, тошкентликлар биринчи бўлимда жуда нурсиз ўйин кўрсатишди. Меҳмонлар индивидуал жиҳатдан кучли ҳужумчилар орқали хавф уюштиришга ҳаракат қилишди, аммо "Пахтакор" дастлабки 45 дақиқаликда голга тортадиган вазиятни юзага келтира олмади.
Жамоамиз иккинчи бўлимни анча фаол бошлади ва бирин-кетин рақиб дарвозаси томон босим уюштирди. Аммо, кутилмаганда, "Ал-Айн" битта ҳужум ташкил қилиб, ҳисобни очишга муваффақ бўлди. "Пахтакор" ҳимоячилари жарима майдони яқинида Мирослав Стохни ёлғиз қолдиришди ва словакиялик 20 метрлардан зарба йўллаб, даврозани ишғол қилди. Лобанов яқин бурчагидан тўпни ўтказиб юборди.
Ўйин тугашига 15 дақиқа қолгани кореялик Ким Жонг Хёк захира ҳакамининг тавсиясига кўра Стохни майдондан четлатди. Сон жиҳатдан устунликдан ҳам Бабаян шогирдлари фойдалана олишмади.
Ушбу мағлубиятдан кейин "Ал-Айн" ўз очколарини 5тага етказди ва "Пахтакор"дан ўтиб кетди.
ОЧЛ. "В" гуруҳи, 3-тур
"ПАХТАКОР" - "АЛ-АЙН" - 0:1 (ОНЛАЙН ТРАНСЛЯЦИЯ)
Гол: Мирослав Стох (61)
Огоҳлантиришлар: Жавоҳир Соҳибов (45+1) — Аҳмад Барман (65), Жирес Экоко (72)
Четлатиш: Мирослав Стох (75)
"Пахтакор": 12.Александр Лобанов, 2.Егор Кримец, 4.Аднан Ораховац (Анвар Солиев 78), 15.Жавоҳир Соҳибов (Баҳодир Пардаев, 70), 7.Кахи Махарадзе, 29.Владимир Козак, 10.Жамшид Искандеров, 11.Игор Сергеев, 23.Александр Мерзляков, 24.Давронбек Ҳошимов, 28.Станислав Андреев (Жалолиддин Машарипов 64)
"Ал-Айн": 17.Холид Иса, 5.Исмоил Аҳмад, 19.Муҳаннад Салим, 23.Муҳаммад Ғариб, 44.Фарис Жума, 9.Жирес Кембо Экоко (Сайид Мусаббеҳ 90+1), 16.Муҳаммад Абдулраҳмон (Рашид Муҳайер 90+3), 18.Иброҳим Диаки (Сайид Ал-Катирий 85), 24.Аҳмад Барман, 99.Мирослав Стох, 29.Ли Мюн Жу
Бош ҳакам: Ким Жонг Хёк (Ж.Корея)
