"Машъал" клуби директори Илҳом Қурбонов мавсум олдидан жамоадан кетган футболчилар ҳақидаги саволларга жавоб бериб ўтди.
"Мавсум олдидан бир қатор футболчилар жамоадан кетди. Аммо "Машъал" бундан ҳеч қандай иқтисодий зиён кўргани йўқ. Ҳамма футболчилар трансфер қоидалари асосида сотилди.
Элдор Шомуродова ва Отабек Шукуровлар борасида "Бунёдкор"дан яхши таклиф тушди ва биз уни қабул қилдик. Жаҳонгир Абдумўминов эса "Олмалиқ"қа трансфер қилинди. Биз бу трансферлардан тушган маблағни академия ва ўринбосарлар жамоаси учун сунъий майдон қуришга сарфламоқчимиз.
Бизда машғулот ўташ учун сунъий майдон бор, аммо футбол учрашувлари учун барча стандартларга жавоб берадиган майдонга эҳтиёжимиз бор эди. Биз бу майдонни ўз кучимиз ҳисобига қурмоқчимиз.
Клубимиз бир йиллик ёки олти ойлик шартномалардан воз кечган. Фақат ёши катта футболчилар билан қисқа муддат ҳамкорлик қилишимиз мумкин. Аммо бундай ҳолатлар кўп бўлмайди. Асосий эътибор ёш ва иқтидорли футболчилар билан узоқ муддатли шартнома имзолашга қаратилади", - дейди Илҳом Қурбонов.
