Кеча ташланган қуръа натижасига кўра, Европа чемпионлар лигасининг чорак финалида "Атлетико Мадрид" ва "Реал Мадрид" жамоалар ўзаро тўқнаш келадиган бўлдилар.
Хабарингиз бор, ушбу жамоалар ўтган йили мусобақа финалида тўқнаш келишган эди. Ўшанда Диего Годин томонидан киритилган гол эвазига "матрасчилар" ҳисобда олдинга ўтиб олишганди. "Реал" эса 90+3-дақиқада ҳисобни тенглаштиришга муваффақ бўлганди, холос. Қўшимча бўлимларда Анчелотти шогирдлари Бэйл, Марсело, Роналдунинг голлари эвазига ғалабани ўз томонларига оғдиришганди.
Қизиқ, ўша ўйинда кейин "Атлетико" ва "Реал" шу пайтгача 6 марта ўзаро тўқнаш келдилар. Ўша ўйинларнинг 4тасида Диего Симеоне шогирдлари ғалаба қозонишган бўлса, иккита ўйинда дуранг қайд этилди. "Атлетико" бу ўйинлар орқали рақибини Испания суперкубогидан маҳрум қилди, Испания кубогидан чиқариб юборди, Ла лига доирасида эса 6 очкодан маҳрум қилди. Қисқа қилиб айтганда, "ҳиндулар" ЕЧЛ финалида мағлубият учун "Қироллик клуби"дан қасос олиб келишмоқда.
Диего Симеоне Чемпионлар лигаси доирасида ҳам ҳамшаҳарларини хафа қила оладими? Улар ўтган мавсумда ўзлари бой берган кубокни бу йил "Реал"дан тортиб ола билишадими? Жавлон Назаров ўз карикатураси орқали ана шу ҳолатга ишора қилаётган бўлса ажабмас.
