Хабар берганимиздек, Ўзбекистон пляж футболи терма жамоаси бугун Қатар пойтахти Доҳа шаҳрида Осиё чемпионатининг гуруҳ босқичидан ўрин олган илк учрашувида қумга тушади. Аслида Аҳад Юсупов шогирдлари кеча гуруҳнинг дастлабки ўйинида Фаластин билан учрашишлари керак эди. Лекин Фаластин мусобақага келмагани учун гуруҳда 3 та жамоа плей-оффга бериладиган икки йўлланма учун баҳс олиб бориши ойдинлашди.
Бугун терма жамоамиз илк турда Ироқдан 7:5 ҳисобида устун келган БАА билан ўйнайди. Шу ўринда терма жамоамизнинг Қатарга келиши олдидан БААда ўтказган йиғини доирасидаги ўртоқлик учрашувлари ҳақида. Юсупов шогирдлари Дубайда 2 та ўйин ўтказиб, аввалига маҳаллий “Ал-Аҳли” клубига 1:3, кейин эса Озарбайжон терма жамоасига 2:3 ҳисобида имкониятни бой берган.
