2016 йили Бразилиянинг Рио-де-Жанейро шаҳрида ўтказиладиган Ёзги Олимпия ўйинларининг футбол баҳсларига Осиё қитъасида саралаш баҳслари бошланди. Кеча “А” ва “С” гуруҳларида 4 та учрашув бўлиб ўтди.

“А” гуруҳида Ливан терма (U-23) жамоаси Мальдив оролларидан 2:1 ҳисобида устун келди. Гуруҳнинг иккинчи ўйинида Баҳрайн ва Уммон терма жамоалари 1:1 ҳисобида дуранг ўйнашди. “С” гуруҳида эса Эрон терма жамоаси непалликлар дарвозасини жавобсиз 5 бор ишғол қилди. Фаластин эса Афғонистон олимпиячиларини 2:0 ҳисобида таслим этди.

Эслатиб ўтамиз, шу кунларда Ўзбекистон олимпия терма жамоаси Бангладеш пойтахти Дакка шаҳрида бўлиб турибди. Бахтиёр Ашурматов жамоаси 27-31 март кунлари айнан Бангладешда бўлиб ўтадиган саралаш баҳсларида Сурия, Ҳиндистон ҳамда мезбонларга қарши баҳс олиб боради.

Ушбу саралаш баҳслари ғолиблари келаси йили баҳорда Қатар пойтахти Доҳа шаҳрида ўтказиладиган Осиё чемпионатининг финал босқичига йўлланма олади. Қитъа чемпионати эса бевосита Риога борадиган жамоаларни аниқлаб беради.