Пьер-Эмерик Обамеянг ва Марко Ройс «Рур дербиси» («Боруссия» Д.-«Шальке»-3:0)да голни тегишлича Бэтмен ва Робин ниқоби остида нишонлашди. «ССФ» нашри эса шу муносабат билан яна кимлар майдоннинг ўзида ниқоб-шоу уюштиришганини эслатди.
Дортмунд «Боруссия»си юлдузлари - Пьер-Эмерик Обамеянг ва Марко Ройс. Бундеслиганинг 23-туридан ўрин олган «Шальке»га қарши учрашувда ҳисобни очган Обамеянг меҳмонлар дарвоза томон югурди ва унинг ортига аввалдан яшириб қўйилган 2та ниқобни олди - ўзи учун Бэтмен, Ройс учун Робинникини. Габонлик ҳужумчи ўйиндан сўнг Bild нашрига интервью бериб, бу саҳнани олдиндан режалаштиришганини яширмади: «Тушлик пайти голни шу тариқа нишонлаш хусусида ўзаро келишиб олгандик».
Яна ўша Пьер-Эмерик Обамеянг. У 2012 йили «Сент-Этьен» сафида «яшиллар»нинг собиқ дарвозабони Жереми Жанони ожиз қолдириб, Спайдермен қиёфасига кирганди. Ўшанда габонлик легионер ўз хатти-ҳаракатига шундай изоҳ берган: «Ле-Ман» сафига қўшилган собиқ дарвозабонимизга унингсиз кийиниш хонамиз ҳувиллаб қолганлигини билдирмоқчи бўлдим...».
Факундо Сава. 2002-2004 йиллар оралиғида «Фулхэм»да ўйнаган аргентиналик ҳужумчи бир сафар голни гетраси ичига яширинган Зорро ниқобини олиб кийганча нишонлаганди. Кейинчалик инглиз журналистларининг аниқлашларича, Сава ажойиб коллекционер экан. Яъни унинг 250 турдаги ниқобдан бой коллекция тўплагани ойдинлашди.
Жереми Жано (Обамеянг айнан унинг шарафига Спайдермен ни-қобини кийган). «Сент-Этьен» дарвозабони 2005 йили Франция чемпионати доирасидаги ўйинга «Ўргимчак одам» формасида тушди. У ўша учрашув давомида фақат юзидаги ниқобни ечган, холос.
Иван Кавьедес. Эквадорлик футболчи ЖЧдек йирик турнирда юзига ниқоб тортишга жазм этганди. У 2006 йили Коста-Рика термаси дарвозасига гол ургач, «Ўргимчак одам» ниқобига «бурканди». Кавьедес бу билан голларни шу тариқа нишонлашни ёқтирган марҳум жамоадоши Отилино Тенорио хотирасини ёд этган экан.
Марко Матерацци. Шафқатсиз ҳимоячидек таассурот уйғотган италиялик футболчи 2010 йилнинг январида «Интер»нинг «Милан дербиси»даги ғалабасини нишонлаш чоғи рақиб жамоа хўжайини Сильвио Берлускони ниқобини кийди. Бир қарашда, «Интер» вакили «Милан» соҳибининг худди ўзидек кўринганди.
«Ливерпул»-2009. Жамоа футболчилари Рождество шарафига шаҳардаги тунги клублардан бирида ниқоб-шоу уюштиришди. Ўшанда улар турли образларга киришганди...
