Олий лига-2015 деганлари бизга миллий биринчилик баҳсларимизга нисбатан мана шундай савол билан мурожаат қилишга мажбур қилиб қўймоқда. Сарлавҳани жуда ҳам ошириб юборибсиз дейсизми? Йўқ, ҳозирча меъёрида. Тўғри, эндигина икки тур ортда қолди. Ҳозирча чемпионатга нисбатан қандайдир муносабат билдиришга бироз эртадир. Бироқ ўйинларга қаранг!
Гапирмай бўладими буларни? Қайд этилётган ҳисоблар, натижалар, кутилмаган тўпурар ижрочилар бизни ҳайратга қўймоқда. Илк турда “Қўқон-1912” жамоаси Самарқандда ғалаба қозонди, “Локомотив” клуби икки турдан бери зафар нима эканлигини билмаяпти, “Олмалиқ” эса “Пахтакор” ва “Насаф” билан кетма-кет тўқнашиб улардан қимматли очколарни тортиб олди. Менимча, булар бошланиши бўлса керак. Дуранглар сони ҳам кўп. Бу ўйинларни муросасиз ўтишидан далолат беради.
Тўртта грандимиздан ташқари “Олмалиқ” ва “Нефтчи” ОЧЛ учун ҳаракат бошлади. Бу тўғрисида жамоалар мураббийлари айтиб ўтишган. Бу дегани 6 та жамоамиз ОЧЛ йўлланмасини қўлга киритиш учун ҳаракат қилади. Бу ҳам турнир жадвалининг дастлабки қисмида жиддий кураш бўлишига замин яратиб беради. Яна бир тарафдан қарайдиган бўлсак, қуйи лигадан чиққан “Шўртан” ва “Қўқон 1912”нинг иштаҳаси ҳам ёмон эмас. Ўтган йилни биринчи лигада ўтказган бу жамоалар кучлилар сафида қолиш учун ёки бўлмаса ўз ўрнини топиш мақсадида борларини беришлари аниқ.
Келишилган ўйинлардан қутулганга ўхшаймиз чоғи. Сездингизми, икки тур ажойиб ўтди ва кутилмаганда МТЖмиз сафида Олий лиганинг оддий жамоаларидан ўйинчилар пайдо бўлиб қолди. Муҳими, улар янги номлар, янги ижрочилар. Ҳатто, МТЖ таркибида гол уришга ҳам улгуришди. Ниҳоят, оддий жамоаларимиз сафида ҳам Миржалол Қосимовнинг кўнглидагидек ижрочилар етишиб чиқмоқда. Натижада “МТЖда ўйнаш учун грандлар таркибида ўйнаш шарт эмас экан-да” деган фикр билан бошқа футболчилар ҳам бош жамоамиз сари олға боришларини юзага келтиради.
Олий лигадаги 16 та жамоа мураббийлари ҳалол футбол ўйнашга келишиб олишгани ҳақиқатга яқинга ўхшайди ва биз бундан хурсандмиз. Ана энди мухлислар яна стадионларга қайтишади, яна ареналаримизни тўлдириб футбол томоша қилишади ва балки мухлисларни стадионга чорлайдиган қандайдир лотерея ўйинларига ҳам ҳожат қолмайди.
Олға, Олий лига-2015!
Ҳожиакбар Жабборов.
“Рухсор” телерадиоканали (Фарғона)
