Ўйиндан кейинги матбуот анжуманида ҳар икки жамоа бош мураббийи ОАВ вакиллари саволларига жавоб қайтарди.
Самвел БАБАЯН (“Пахтакор” бош мураббийи): - Бугунги баҳс биз учун жуда муҳим эди. Чемпионатда аввалги ўйинда очко йўқотгандик. Футболчилар яхши ўйин кўрсатишди ва чиройли ғалабага эришдик. Улар ўзларидан талаб қилинган кўрсатмаларни бажаришди.
Сергеев ҳозирда мамлакатимиздаги энг яхши ҳужумчилардан бири. Унинг голлари эвазига зафар қучдик. Баъзида ҳужумлар чоғида зарба беришда муаммоларга дуч келяпмиз. Игорь ҳали ўз устида ишлаб, янада кучлироқ ҳужумчига айланишига ишонаман.
Ҳар бир дарвозабонда омадсиз даврлар бўлади. Лобановда ҳозир шундай ҳолат содир бўляпти. “Ал Айн” билан учрашувда у қайтариш қийин бўлган вазиятда тўпни қайтарди, бироқ кейин узоқ масофадан зарбани ўтказиб юборди. Бугун ҳам унда хато бўлди. Баъзида шундай ҳолатлар юз бериб туради. Мен уни Ўзбекистондаги энг кучли дарвозабон деб биламан.
Александр МОЧИНОВ (“Бухоро” бош мураббийи): - Ўйин қизиқарли кечди. Жамоалар майдонда жиддий кураш олиб боришди. Голларни эса хатоларимиз эвазига ўтказиб юбордик. “Пахтакор” сафида маҳоратли ва тажрибали футболчилар кўп. Шу жиҳат ўйин тақдирини ҳал қилди. Жамоа ўйинини кучайтириш устида иш олиб боряпмиз. Янги футболчиларнинг жамоага киришиб кетиши учун бир оз вақт керак.
Тожиевда жароҳат борлиги сабабли бугун тўлиқ ўйнамади. У ўзига келиб, жамоага катта фойда келтиришига ишонаман.