5 апрелда Африка футбол конфедерацияси Чемпионлар лигасининг 1/16 босқичида Гананинг “Асанте Котоко” ва Жазоирнинг “Ал-Ульма” клублари ўртасидаги ўйиндан сўнг ганалик футболчилар майдондан зирҳли машиналарда олиб чиқиб кетилди. Ўйинда меҳмон жамоа – “Ал-Ульма” жамоаси 2:1 ҳисобида ғалаба қозониб, кейинги босқичга чиқди. Биринчи ўйин 0:0 ҳисоби билан якунланган эди.
“Асанте Котоко” мухлислари ўз клубларининг мусобақадан чиқиб кетганидан дарғазаб бўлиб, бевосита майдоннинг ўзида футболчилар билан гаплашиб қўйиш учун майдонга отилиб чиқдилар. Полиция жунбушга келган мухлислардан ўйинчиларни сақлаб қолиш учун зудлик билан чора кўришига тўғри келди.
Бу орада “Асанте Котоко” мусобақада муваффақиятсиз иштирок этгани учун ўз мухлисларидан узр сўради.
“Асанте Котоко” Африка Чемпионлар лигасининг икки мартоба ғолиби ва Гананинг 21 карра чемпиони ҳисобланади.
