Британия телевидениесида фаолият юритаётган “Ливерпуль” ҳамда Англия терма жамоаси собиқ ҳимоячиси Жейми Каррагер “Манчестер Юнайтед” ҳужумчиси Робин ван Персининг ҳолати ҳақида фикрларини айтиб ўтди. Голландиялик футболчи 21-феврал “Суонси”га қарши ўйинда болдиридан жароҳат олганидан буён “қизил иблислар” лазаретида бўлиб турибди.
“Ван Перси “Манчестер Сити”га қарши дерби учрашувида асосий таркибда майдонга тушади деб ўйламайман. “МЮ”нинг ўйинларидан охирги вақтда марказий ҳужумчи Уэйн Руни эканини билиб олиш қийин эмас. Гарчи ван Перси ҳамда Ван Галнинг муносабатлари яхши бўлса ҳам, бу Рунининг таркибдаги ўрни масаласида ҳал қилувчи омил бўла олмайди.
Ван Персига мундиалдан кейин ўзига келиши учун маълум вақт керак бўлди. Буни устига ўтган мавсумда оғир жароҳатлар ҳам олганди. “Арсенал”да ўйнаган вақтларида ҳам жароҳатлар таъқиб қилган. “МЮ”даги илк мавсуми силлиқ кечган, аммо орадан анча вақт ўтди, кўп нарсалар ўзгарди. Ҳозир Руни — асосий форвард, ван Перси эса ўзига имконият беришларини кутишига тўғри келади”, — дея Каррагер сўзларидан иқтибос келтиради Championat.com.
