Kun.uz: Аргентиналик собиқ футболчи ва мураббий Диего Марадона Халқаро футбол федерациялари Ассоциацияси (ФИФА) президенти Йозеф Блаттерни коррупцияда айблади. Бу айбловларга ташкилот президентлигига бешинчи марта Блаттер номзодининг кўрсатилиши сабаб бўлган.
“Блаттер коррупцияга ботган. У одам бирор марта ҳам тўп тепмаган бўлса ҳам, чекланмаган ҳокимиятга эга. Иордания шаҳзодаси Али бин ал-Ҳусайндан бошқа ҳеч ким у билан рақобатлаша олмайди” – унинг сўзларини келтиради ABC.es.
Блаттер ва ал-Ҳусайндан ташқари, президентликка “Барселона” ва “Реал”нинг собиқ футболчиси Луиш Фигу номзоди ҳам кўрсатилган.
79 ёшли Йозеф Блаттер ФИФАни 1998 йилдан буён бошқаради.
