Франциянинг “Пари Сен-Жермен” футбол клуби ўз ҳужумчиси Златан Иброҳимовичнинг 4 ўйинга четлатилиши муддатини қисқартириш мақсадида Франция Миллий Олимпия қўмитасига мурожаат этди, деб хабар бермоқда Le Parisien нашри.
Франция Профессионал футбол лигаси (LFP) интизом қўмитаси Иброҳимовични Франция чемпионатининг 29-тури доирасида “Бордо” билан ўтказилган учрашувдан (2:3) кейин ҳақоратомуз сўзларни айтганликда айбдор деб топган.
Қўмита “ПСЖ” клуби ва LFP ўртасида восчитачини тайинлайди. Нашр воқеа ривожланишининг учта вариантини тахмин қилмоқда: воситачи санкцияни ҳаққоний деб топиб, жазони юмшатиш бўйича мурожаат қилишдан бош тортади; воситачи четлатилиш муддатини қисқартиришни сўрайди ва ниҳоят, воситачи LFP’га Иброҳимовичнинг ишини қайта кўриб чиқишни таклиф қилади.
Қайд этилишича, воситачи тайинланадиган бўлса, четлатилишнинг амал қилиши вақтинчалик тўхтатиб турилади. Бу эса Иброҳимовичга 18 апрелда миллий чемпионатнинг навбатдаги турида “Ницца”га қарши учрашувда майдонга тушишга имкон беради.
