"Реал" яримҳимоячиси Лука Модрич жароҳати туфайли мавсумнинг қолган қисмини ўтказиб юборади, дея хабар беради AS.
Модрич Испания чемпионатининг 32-турида "Малага" билан учрашувда (3:1) тиззасидан жароҳат олиб алмаштирилди. Ўйиндан кейинги тиббий текширув унинг камида олти ҳафта футбол ўйнай олмаслигини кўрсатди, бу хорватиялик футболчи учун мавсум якунланди деганидир.
29 ёшли футболчи бу мавсум Испания чемпионатининг 16 учрашувида майдонга тушиб бир гол урган ва уч голли узатма оширган.