Тошкент, 20 апрель - Эртага "Локомотив" Осиё чемпионлар лигасининг 5-тур доирасида "Ал-Ҳилол"га қарши майдонга тушади. Бугун "Локомотив" стадионида ўйиндан олдинги матбуот анжумани ташкил қилинди.
Матбуот анжуманига дастлаб "Ал-Ҳилол" бош мураббийи Гиоргос Донис ҳамда жамоанинг 17-рақамдаги ўйинчиси Абдуллоҳ Ал Ҳафиз ташриф буюрди.
— Меҳмондорчилик учун раҳмат. ОЧЛдаги ҳар бир ўйин муҳим ҳисобланади. Ўтган йил жамоа мусобақанинг финалига қадар етиб борган. Бу йил ҳам камида финалга чиқишга интиламиз. Икки ой олдин "Локомотив" у қадар яхши спорт формасида эмасди. Айни пайтда эса жамоа кучайган ва бизга қарши жиддий тайёрланганини биламиз.
Тайёргарлик ҳақида
— Албатта, муаммоларимиз бор. Аммо барчаси машғулотлар вақтида маълум бўлади. 19 кун ичида 6та ўйин ўтказдик. Жамоа ҳам руҳан, ҳам жисмонан чарчаган.
Носир аш-Шамроний ҳақида
— Носир аш-Шамроний биз билан Ўзбекистонга келди. Унинг майдонга тушиш-тушмаслиги ҳозирча маълум эмас. Бугун кечгача ОФКдан жавоб келади, агар рухсат берилса майдонга тушиши мумкин.
