Хабарингиз бор, кеча Осиё чемпионлар лигасида 5-турнинг қолган учрашувлари ўтказилди.

Кун доирасидан ўрин олган баҳслардан бирида “Бунёдкор” “Ал Наср”га қарши баҳс олиб борди. Анчагина муросасиз руҳда кечган беллашув Саудия жамоасининг кичик ҳисобдаги ғалабаси билан якунланди.

Учрашувдаги ягона голга муаллифлик қилган Адриан Миержеевский SPORTS.uzга ўзининг ўйин борасидаги фикрларини билдириб ўтди.

- Биз учрашувни ёмон ўтказмадик. Асосийси – жуда муҳим уч очкони қўлга кирита олдик. Ўйин жуда оғир кечди. Боиси “Бунёдкор” футболчилари ҳам ҳар бир жабҳада биздан қолишмасликка ҳаракат қилишди. Энди олдинда турган учрашувлар ҳақида ўйлаймиз. Жамоамга ғалаба келтирган голга муаллифлик қилганимдан жуда ҳам шодман. Боиси ғалаба тўпини киритиш ҳар бир футболчига ўзгача завқ бағишлайди. Айниқса, ушбу гол жуда муросасиз кечган беллашувда киритилса, у кишига бошқача ҳузур бағишлайди. 

Эндиги мақсад – қолган беллашувларда ҳам ғалаба қозониш ва Осиё чемпионлар лигасида иложи борича узоқроққа бориш. Ўйлашимча, бунинг устидан чиқа оламиз, - дейди 28 ёшли поляк ярим ҳимоячиси.