“Милан” бош мураббийи Филиппо Индзаги ва жамоа футболчилари сафардаги “Удинезе”га қарши кечган учрашувда 2:1 ҳисобидаги мағлубиятдан сўнг жанжаллашиб қолишди.

Воқеа жамоа Миланга қайтаётган вақтда автобусда рўй берди. Индзаги жамоа билан ёлғиз гаплашиб олмоқчи эканини билдириб, клуб вице-президенти Адриано Галлианидан чиқиб туришни илтимос қилган. Суҳбат чоғида Индзаги ўйинчиларга “Милан” футболкасини кийишга нолойиқ эканини айтган. Бунга жавобан номи ошкор қилинмаётган футболчилардан бири мураббийга “Балким биз бу футболкани кийишга лойиқ эмасдирмиз, лекин сиз ҳам “Милан” мураббийи бўлишга лойиқ эмассиз”, деб жавоб қайтарган.

Бундан ташқари, “Милан” президенти Сильвио Берлускони жамоа натижаларидан норози бўлиб, бош мураббийни лавозимидан озод қилмоқчи бўлган. Бироқ Галлиани билан бўлган телефон суҳбатидан сўнг бу қароридан қайтган.

“Милан” жорий мавсумда 9та маротаба мағлубиятга учраган ва мусобақа жадвалида 10-ўринда бормоқда.