Бугунги ўйиндан сўнг Рўзиқул Бердиев ҳам ўз фикрлари билан ўртоқлашди. Унинг кайфияти жуда яхши эди.

Рўзиқул Бердиев:

– Бугун ўйин дербига хос бўлди. Стадионга йиғилган мухлислар ҳам чиройли ўйин гувоҳи бўлишди. “Шўртан” жамоасининг бу йилги мавсумда олдига жиддий мақсадларни қўйгани кўриниб турибди. Бу ўйин билан мақсадларига эришади деб, ҳам ўйлайман. Ғалаба осонликча қўлга киритилмади. Кейинги пайтда мени хурсанд қилаётган нарса, йигитларимиз ўзларига хос характер намойиш қилишаяпти, ўзларида куч топишиб, ютқазиб турган жойда ғалаба қозонишаяпти. Мен ўз навбатида бунинг учун йигитларга миннатдорчилик билдираман. Бугунги ўйин тенг курашлар остида кечди ва бу тенг ўйинда биз ғалаба қозондик.

– Бу йилги мавсум тақвимини кузатсак, “Насаф” кейинги пайтда ўйинларда жуда катта куч сарфлаяпти, яъни тақвим жуда тизиқ, мана яна 1 май куни “Локомотив” билан майдонга тушасизлар, кейин яна ОЧЛ ўйини, шунга “Локомотив” билан ўйинни кейинроқга қолдирса бўлмайдими, бундан футболчилар толиқиб қолишмайдими?

– Ҳа, навбатдаги ўйинимиз “Локомотив”га қарши бўлади. Сиз айтганча бу масалани олдинроқ ҳал қилиш керак эди, аммо худди биздек “Локомотив”да ҳам шундай вазият. Албатта, бундан йигитларимизда ҳам очиқ футбол намойиш этишга таъсир кўрсатаяпти. Бунинг устига захира ўриндиғимиз ҳам бой эмас. Бугунги ўйинда бир қанча ўйинчиларимизни майдонга туширмадик, шундай қилишга мажбурмиз ҳам. Чунки олдимизда бугунгидан муҳим ўйинлар кутиб турибди. Шундай бўлсада, ғалаба қозонишга ҳаракат қилаяпмиз ва буни йигитлар уддалашаяпти.

– Шуҳрат Муҳаммадиевни қачон майдонда кўрамиз?

– Шуҳрат умумий таркиб билан машғулот ўтказаяпти, умид қиламанки 4-5 кунда у асосий таркибда майдонга тушишга тайёр бўлади.