Ҳамюртларимиз орасида ФИФА ва ОФК байроғи остидаги турли мусобақаларда ҳакамлик ёки ассистенлик қилаётганлар етарли. Аммо комиссар ҳамда назоратчилар борасида бундай фикр билдиролмаймиз. Назоратчилардан биргина Фарҳод Абдуллаевни тилга олсак, комиссарлар 2 нафар - ЎФФ матбуот хизмати бошлиғи Санжар Ризаев ва федерация техник бўлими раҳбари Олим Арифов. Эътиборлиси, 28 ёшли Арифов ОФКнинг энг ёш комиссари ҳисобланади. Қувонарлиси, у яқинда ФИФА комиссарлари рўйхатига ҳам киритилди. Демак, шу пайтгача ОФК миқёсидаги мусобақаларда расмий шахс сифатида ишлаб келган Арифов эндиликда ФИФА тасарруфига кирувчи турнирлар, жумладан, ЖЧ-2018 саралаш баҳсларида ҳам комиссарлик қилади. Биз шу муносабат билан ёш мутахассисимиздан қисқача интервью олдик.
- Олим, авваламбор, ФИФА комиссари мақомини олганингиз билан табриклаймиз. Бу хабарни биринчи бўлиб ким ва қачон етказди?
- Табрик учун раҳмат. Мен Жанубий Кореяда эдим. Кечқурун меҳмонхонада ишлаб ўтирсам, интернет орқали ОФКдан шундай хабар келди. Очиғи, аввалига бунга ишонмадим, худди тушдек туюлди. Беихтиёр кимдир апрель ҳазили қиляпти, чоғи, деб ўйладим. Эртасига эса эрталабдан табрикларни қабул қила бошладим. ОФК ва ФИФАда ишлаётган ҳамкасб дўстларим, танишларим табриклашди. Шундан кейингина бу маълумотнинг ёлғон эмаслигига ишонч ҳосил қилдим.
- Демак, бу сиз учун кутилмаган ҳолат бўлди...
- Албатта. Бу ёшда ФИФА комиссари мақомини олиш шахсан мен учун оламшумул янгилик. Ҳа, ФИФА комиссари бўлишни орзу қилардим, лекин ўз мақсадимга бу даражада тез етишишни хаёлимга ҳам келтирмагандим. ОФК комиссари сифатидаги фаолиятим 2011 йили бошланди. Шу қисқа вақт оралиғида ОФК байроғи остидаги қитъа мусобақаларда ишладим. Жумладан, клублар ўртасида ОФК кубоги ҳамда ОЧЛ, шунингдек, терма жамоалар миқёсида умумий ҳисобда 60тага яқин учрашувда комиссарлик қилдим. Қисқаси, бир сўз билан айтганда, бу мен учун 2015 йилнинг энг яхши янгилиги янглиғ янгради.
- Сизни ФИФАнинг энг ёш комиссари сифатида ҳам табрикласак бўладими?
- Бу масалада тайинли жавоб беришга қийналаман. Сабаби, ФИФА комиссарларининг рўйхати расман эълон қилинмайди Аммо ҳар қандай ҳолатда ғоят хурсандман ва ўзимни ФИФАнинг энг ёш комиссарларидан бири, деб биламан. Бу ёшда ФИФА комиссари бўлиш - шунчаки, фантастика! Мана, 4 йил ичида ОФК комиссари мақомидан ФИФА комиссари даражасига кўтарилдим. Агар бу йил ФИФА комиссарлари сафидан жой олмаганимда, буни яна 4 йил кутишимга тўғри келарди. Чунки ФИФА комиссарлар рўйхатига ҳар 4 йилда бир марта ўзгартириш киритади. Кимдир ушбу рўйхатдан чиқарилади, бошқа биров таркибга киритилади. Ўзим учун тарихий воқелик айнан шу йил амалга ошганидан бениҳоя хурсандман.
- Комиссарлик билан параллель равишда ЎФФ техник бўлими бошлиғи лавозимида ҳам фаолият юритяпсиз. Ушбу бўлимнинг иши қандай давом этяпти?
- Вазирлар Маҳкамасининг 214-сонли қарори ижросини таъминлаш бўйича белгиланган режа асосида иш олиб боряпмиз. Бу қарорда барча спорт турлари, хусусан, футболда ҳам мураббийлик фаолиятини янада такомиллаштириш чора-тадбирларига алоҳида урғу қаратилган. Қарор ижросини таъминлаш мақсадида ёш мураббийларни имтиҳондан ўтказиб келяпмиз. Улар кўрсатаётган натижалар асосида кўпроқ нималарга эътибор қаратишимиз кераклигини аниқлаб оляпмиз. ОФК ва ФИФА томонидан пойтахтимизда мунтазам равишда ташкил этиб келинаётган PRO гувоҳномаси учун ўқув-курсларини ҳам ўтказишга ёрдам беряпмиз. Бизда мураббийларни ўқитиш тизими яхши йўлга қўйилган. PRO лицензияси учун ўқув жараёни юқори савияда ташкил этилади. Мураббийларга хорижлик кўзга кўринган инструкторлар сабоқ беришди. Айтайлик, германиялик Эрик Ротмюллер ва англиялик Гари Филлипсни алоҳида қайд этиб ўтишим керак. Эрик Германия миллий жамоаси мураббийлар штабида 10 йил ишлаган. Бой тажрибага эга мутахассис. 1996 йили Европа чемпиони ҳам бўлган. Гари эса Англия ўсмир ва ёшлар терма жамоаларида жисмоний тайёргарлик бўйича мураббий ролини бажарган. «Боруссия»нинг ҳозирги бош мураббийи Юрген Клопп ҳам вақтида Эрик Ротмюллер қўл остида PRO гувоҳномаси учун ўқиган ва имтиҳон топширган экан. Шунга қараб хулоса чиқарсак, Тошкентда PRO учун ўтказилаётган ўқув-курслари савия бўйича чакки эмас.
- Фикрингизга қўшиламан, лекин натижа биз учун унчалик яхши бўлмаяпти. PRO лицензияси эга бир қатор мураббийларимиз бугунги кунда ишсиз юришибди. Буни рақобат билан боғлаш керакми ёки бошқа сабаблари ҳам бор?
- Ҳақиқатан ҳам, олий тоифали мураббийларимизнинг айримлари ишсиз юришибди. Бизда хориждаги каби клублар кўп эмас. Мана, бу йилдан олий лига клублари сони 16тага етказилди. PRO гувоҳномасига эга мураббийларимиз эса 60 нафардан кўп. Умуман, бу муаммо фақат бизда эмас, бутун дунёда бор. Мураббийлар сони ҳамиша клублардан кўп бўлади. Қолаверса, PRO лицензиясига эга мутахассисларимиз яхши жойда, камида олий лига клубларида ишлашни исташяпти. «Олий гувоҳномам бўла туриб, 1-лигада ишлайманми?» қабилида ўйлайдиган мураббийлар ҳам йўқ эмас. Агарда улар масалага бошқача ёндашганларида нафақат ўзлари, балки 1-лига савияси ошиши учун ҳам яхши бўларди.
