Озарбайжоннинг Нахичеван шаҳрида шахмат бўйича “Nakhchivan Open-2015” фестивали давом этмоқда. Фестивал иштирокчиларнинг рейтинг ўрнига қараб бир нечта гуруҳларда ташкил этилмоқда. Энг кучли қатнашчилар жам бўлган “А” гуруҳида 17-Жаҳон чемпиони, ҳамюртимиз Рустам Қосимжонов ҳам иштирок этяпти.

Бу ҳақда olamsport.com веб-сайти хабар бермоқда. Айнан шу гуруҳда Қосимжонов биринчи рақамли иштирокчи сифатида қайд этилган. Ниҳоят, кеча ўтказилган 3-тур учрашувида ҳамюртимиз илк ғалабасини нишонлади. Озарбайжонлик Логман Гулиевга қарши оқ доналарда ҳаракат қилган шахматчимиз рақибини мағлубиятга учратди.

Уч имкониятдан икки очкога эга бўлиб турган Қосимжонов турнир жадвалида қўшимча кўрсаткичларга кўра 66 иштирокчи орасида 20-ўринга кўтарилиб олди. 11-поғонадаги Вугар Расулов ҳисобида ҳам 2 очко бор. Бугун ўтказиладиган 4-турда Рустам Қосимжонов қора доналарда ўзи сингари 2 очкога эга бўлиб турган туркиялик Вахап Санал билан муносабатларига ойдинлик киритиб олади.

Таъкидлаш жоиз, мусобақанинг умумий мукофот жамғармаси 40 минг АҚШ доллари бўлиб, унга кўра “А” гуруҳи ғолиби 10 минг доллар мукофот пулига эга бўлади. Иккинчи ўринни эгаллаган шахматчи ўз ҳамёнини 5, кучли учликни якунлаб берган иштирокчи эса 3 минг АҚШ долларига бойитиб олади.