Тошкентда қисқа ўқув-йиғини доирасида Қирғизистон олимпия терма жамоасига қарши ўртоқлик учрашуви ўтказган Ўзбекистон U-22 бош мураббийи Бахтиёр Ашурматов, ўйиндан сўнг Championat.Asia сайти муҳбирлари билан суҳбатлашди.
“Кеча терма жамоага номзод йигитларни Тошкентда тўпладик. Мана бугун Қирғизистон олимпия терма жамоасига қарши ўртоқлик учрашувида майдонга тушдик. Аслида иккита ўйин режалаштиргандик. Кейин режага бироз ўзгартириш киритилди ва иккинчи учрашувда жаҳон чемпионатига ҳозирлик кўраётган ёшлар терма жамоамиз ўйнайдиган бўлди. Минг афсуски, жуда ноқулай аҳволга тушиб қолдик. Тақдиримиз “В” гуруҳи жамоалари қўлида қолиб кетяпти. Мураббийлар штаби, футболчилар бундан жуда ҳам афсусдамиз, бунга ўзимиз айбдормиз”, дейди Ашурматов.
Таъкидлаш керакки, саралаш босқичидаги “B” гуруҳ учрашувлари ҳали ўтказилмади. Ушбу гуруҳ ўйинлари 16-24 май кунларида бўлиб ўтади. Ушуб гуруҳдан Иордания, Қувайт, Қирғизистон, Покистон ҳамда Туркманистон жамоалари ўрин олишган.
“Осиё чемпионати финал босқичига чиқа олмаслик, бу биз учун 2016 йили Бразилияда бўлиб ўтадиган Олимпиада эшиклари беркитилишини ҳам англатади” – дея сўзини давом эттирди мураббий. “Лекин умидни батамом узганимиз йўқ. Охиригача ишонишда ва умид билдиришда давом этамиз. Ўйлайманки, ҳаммаси биз ўйлаганчалик бўлади. Энди тақдиримиз бошқа гуруҳнинг ўйинларига боғлиқ деб тайёргарликни тўхтатиб қўйиш ҳам яхши эмас. Шу сабабли Қирғизистон терма жамоасининг таклифини қабул қилдик. Гувоҳи бўлганингиздек, ушбу ўйинда бир гуруҳ янги футболчиларни ҳам синаб кўрдик”.
Эслатиб ўтамиз, Ўзбекистон олимпия терма жамоаси Қатарда келаси йили бўлиб ўтадиган Осиё Чемпионатига саралаш ўйинларидан сўнг айни вақтда иккинчи ўринни эгаллаган жамоалар ўртасида 5-ўринда турибди. “B” гуруҳда иккинчи ўринни олган жамоанинг натижалари Ўзбекистон олимпия терма жамоасиникидан яхшироқ бўлса, у ҳолда Ўзбекистон олимпия терма жамоаси Осиё Чемпионатига йўл ололмайди.
