ФИФА бугун терма жамоаларнинг янги рейтингини эълон қилди. Унга кўра Ўзбекистон миллий жамоаси апрель ойи жадвалига нисбатан 1 поғона кўтарилди ва 72-ўринга жойлашди.

Бу галги ФИФА рейтингида жуда кичик ўзгаришлар бўлган. Евро-2016 саралаш босқичи доирасида Черногория-Россия ўйини бўйича УЕФАнинг қароридан сўнг (Россияга техник ғалаба, Черногорияга техник мағлубият) жадвалда айрим ўзгаришлар бўлди. Айнан черногорияликлар 5 поғона пастлаши оқибатида Ўзбекистон битта ўринга кўтарилди. Рейтинг балларимизда эса ҳеч қандай ўзгариш бўлмаган. Ўз навбатида Россия 5та ўрин кўтарилиб, 27-қаторга чиқиб олди.

Ўзбекистон Осиёда 6-жамоа бўлиб турибди. Жамоамиз Эрон (40), Япония (50), Жанубий Корея 57, Австралия (63), БАА (68)дан кейинги ўринни эгаллаб турибди.

ЖЧ-2018 ва Осиё кубоги-2019 қўшма саралашининг иккинчи босқичидаги рақибларимиз қуйидаги ўринларни банд этишган: Баҳрайн — 108, Филиппин — 137 (+2), КХДР — 156 (+1), Яман — 168 (+2).

ФИФА рейтингининг юқори қисмида ҳеч қандай ўзгариш бўлмади. Германия бошқаришда давом этмоқда. Кейинги ўринларни Аргентина ва Бельгия банд этишган. Колумбия ва Бразилия 4 ва 5-поғоналарда қайд этилишган. Топ-10ни Голландия, Португалия, Уругвай, Швейцария ва Испания терма жамоалари тўлдириб туришибди.

Янги рейтингнинг тўлиқ кўриниши билан ФИФА расмий сайтида танишиб олишингиз мумкин.