Испания миллий чемпионатида телетрансляциялардан тушадиган даромадни тақсимлаш бўйича можаролар юзага келаётгани боис, бир нечта таниқли футболчилар, жумладан, Андреас Иньеста ва Серхио Рамос Ла лига ўйинларини тўхтатиб қўйиш ҳақидаги қарорни қўллаб-қувватлашди.

Улур пайшанба куни Испания профессионал футболчилар касаба уюшмаси матбуот анжуманида иштирок этишди. Унда улар телетрансляциялар ҳуқуқини сотишдан тушадиган даромаднинг 2016/2017 йилги мавсумдан бошлаб марказлашган ҳолда тақсимланишига ўз норозиликларини билдиришди. Испания ҳукумати тасдиқлаган янги қоидага кўра даромаднинг 90 фоизини юқори дивизион клублари, 10 фоизини эса қуйи лига жамоалари олиши керак.

Испания қироллик футбол федерацияси (RFEF) ҳукумат юқоридаги қарорни қабул қилишда ўзи билан маслаҳатлашмаганидан норози бўлмоқда. Касаба уюшмаси эса даромаднинг тақсимланишида қуйи лига манфаатлари кўпроқ инобатга олинишини талаб қилмоқда. Агар томонлар бир тўхтамга келишмаса, Испаниядаги барча футбол мусобақалари 16 майдан бошлаб тўхтатилиши мумкин. Жумладан, Примеранинг сўнгги 2та тур ўйинлари ва Испания кубоги финал ўйини ўтказилмай қолиши хавфи остида қолмоқда.