«Манчестер Сити» бош мураббийи Хосеп Гвардиола Англия чемпионати 35-турида «Эвертон»га қарши ўйинда (2:2) очко йўқотилганидан сўнг чемпионлик пойгаси ҳақида фикр билдирди.
«Бу энди бизнинг қўлимизда эмас. Илгари шундай эди, ҳозир эса йўқ. Олдимизда ҳали ўйинлар бор. Нима бўлишини кўрамиз», — деди Гвардиола.
Мавсум якунланишига уч тур қолган бир пайтда «Манчестер Сити» 71 очко билан мусобақа жадвалида иккинчи ўринни эгаллаб турибди. Пешқадам «Арсенал» ҳисобида эса 76 очко мавжуд. Шуни ҳам таъкидлаш жоизки, «шаҳарликлар»нинг захирада яна бир ўйини бор.
Кейинги турда «Манчестер Сити» «Брентфорд»га қарши майдонга тушади. «Арсенал» эса «Вест Хэм» билан куч синашади.













