«Ювентус» бош мураббийи Массимилиано Аллегри ЕЧЛ доирасида "Реал"га қарши ўйиндан кейин ўз фикрларини билдириб ўтди.

«Мен юқори савиядаги футболчилар гуруҳига мураббийлик қиламан. Биз ярим финалда иккита ажойиб ўйин ўтказдик. Ҳар иккала жамоада финалга чиқиш имконияти бор эди. Биринчи бўлимда ўз имкониятларимиздан фойдаланишимиз керак эди.

Биз финалда ўйнаш ҳуқуқини қўлга киритдик. Энди эса ҳал қилувчи ўйинда ғалаба қозонишга умид қиламиз. Шунингдек, биз Италия кубоги финалига ҳам яхши тайёргарлик кўришимиз керак — бу ҳам муҳим вазифа. Италия жамоаларидан бири финалга чиққани бутун Италия футболи учун муҳим ҳолат.

Иккинчи бўлимда биз каби "Реал"да ҳам 2-3та яхши вазиятлар бўлди. Бугунги ўйинда жамоани бирор бир жиҳат бўйича айблай олмайман. Бугунги ўйин шундай кечишини билардим. Шу боис шогирдларимдан шижоат билан сифатли ўйнашни сўрадим. Иско ва Хамес Родригес ҳимоявий ўйин борасида унчалик кучли эмас. Шу боис "Реал"га нисбатан прессингни майдоннинг рақибга тегишни қисмида амалга ошириш кераклигини таъкидлагандим.

«Барселона» билан деярли ўйнаб бўлмайди. Лекин улар билан иккита ўйин ўтказиш бошқа, битта ўйин ўтказиш бошқа. Битта ўйинда ҳамма нарса рўй бериши мумкин.

Жисмоний жиҳатдан яхши формадамиз. "Барселона" даҳшатли ҳужум чизиғига эга. Биз ғалабага ишонган ҳолда Берлинга йўл оламиз», – дейди Аллегри.