“Челси” жамоаси бош мураббийи Жозе Моуриньо лондонликлар ишлаган пайтларида бир қатор трансферларга қўл урган. Лекин португалиялик мутахассиснинг амалга оширилган харидларининг кўпчилиги ўзини оқламаган. Ҳаттоки, бу харидлардан битта жамоа тузиш мумкин. Қуйида мана шу трансферлар ҳақида сўз юритамиз.

Дарвозабон: Илариу

Энрике Илариу “Челси”га келишдан аввал Моуриньо билан бирга ишлаган ва шу туфайли 2006 йилда “Челси”га кўчиб ўтади. Минг афсуски, “кўк”ларда бу вақтда Петр Чех асосий дарвозабон ҳисобланарди. Шу туфайли Илариу етарлича ўйин амалиётига эга бўлмади ва фаолиятини заҳирада ўтказишга мажбур бўлди. Айтиш лозимки, Илариу “Челси”да 8 мавсум тўп сурган бўлса, шу вақт ичида атига 20 марта майдонга тушди.
 
Ҳимоячилар: Таль Бен - Хаим

Исроиллик футболчи ҳам 2007 йилда “Челси”га келди. Унгача футболчи “Болтон”да ажойиб ўйинлари билан Моуриньонинг назарига тушганди. “Челси”га ташрифидан сўнг у ҳам заҳирага ўтириб қолди. Португалиялик мутахассис Терри ва Карвалью дуэтидан бирортаси жароҳат олган вақтда исроиллик ҳимоячини майдонга туширарди. Шу тариқа мавсум ичида футболчи атига 13 бора майдонга тушди холос.
 
Холид Булахруз

“Гамбург”нинг ишонган тоғи бўлган ҳимоячини “Челси” 8,5 миллион фунт стерлинг эвазига харид қилди. 2006 йилда амалга оширилган трансфер ўзини оқламагани туфайли “Челси” уни “Севилья”га ижарага беришга қарор қилди. Моуриньо ҳимоячига Англия Кубокларида майдонга туширди. Бироқ унинг ҳаракатларидан қониқиш ҳосил қилмаганлигини таъкидлаб ўтди. Кейинчалик заҳирага михлаганди. Шундан сўнг футболчини фаолиятида кескин пасайишлар даври юз берди.
 
Асьер Дель Орно

2005 йилда 8 миллион фунт стерлинг эвазига “Челси”га келган ҳимоячи “кўклар”да ўйнаб кета олмади. Биласизми, Дель Орно биринчи йилдаёқ клуб билан Англия чемпиони номини қўлга киритди. Кейинги мавсумида эса уни ҳаттоки 18 талик рўйҳатдан ҳам учратмадик. Бу эса футболчининг жонига теккан кўринади, кетишга қарор қилди.
 
Ярим ҳимоячилар: Стив Сидуэлл

Сидуэлл “Рединг”ни етакчиси эди. Шу сабабли Моуриньо ўйлаб-ўтирмасан уни сотиб олди. Стив “кўклар”да 9-рақам остида тўп сурадиган бўлди. Рақамига ярага футбол кўрсата олмади. Кўп вақтини заҳирада ёки клуб ўринбосарларида ўтказган ярим ҳимоячи “Челси”дан кетди. Ҳозиргача футболчи “Рединг”да кўрсатган ўйинларини такрорлай олганича йўқ. Ўзи ҳам “Челси”га ўтиб катта хато қилганлигини таъкидлаб келади.
 
Шон Райт - Филиппс

2005 йилда “Челси” бу футболчини 21 миллион фунт стерлинг эвазига сотиб олади. бир қарашда бу трансфер ўзини оқлайдигандек эди. Негаки, ўша кезларда бу йигитча Англияни ларзага солиб келаётганди. Унинг иқтидорлига ҳеч ким шубҳа қилмасди. “Челси”га келгач эса вазият бошқача тус олди. Шон умуман ўзини кўрсата олмади. Эътибор беринг, 21 миллион фунт стерлингга харид қилинган футболчи уч йил “Челси”ни заҳирасида қолиб кетди. кейинчалик “Манчестер Сити”га қайтди. Бироқ ўзини кўрсата олмай, жамоалари сонини алмаштиришга қарор қилди. 2013 йилда “КПР”га кўчиб ўтган Шон Райт-Филиппс “Челси” дарвозасига гол уриб, собиқ жамоасининг мағлубиятсиз сериясига барҳам берганди.
 
Тьягу Мендеш

Моуриньо ҳамюртини 8 миллионга қўлга киритди. Биринчи йили у клуби сафида 34та учрашувда майдонга тушди ва жамоасини ишончини оқлади. Кейинги мавсумда эса Жозе Майкл Эссеньни харид қилишни мақсад қилди. Бунинг учун мураббий “Лион”га 24 миллион фунт билан биргаликда ҳамюртини ҳам қўшиб бериб юборади. Шу тариқа, Мендешнинг “Челси”даги даври тез тугайди.
 
Иржи Ярошик

2005 йили ЦСКАдан сотиб олинган Ярошик “Челси”га мослаша олмади. Бунинг оқибатида мавсумнинг ярмида уни “Бирмингем”га ижарага беришди. У ердан қайтиб келганидан сўнг Моуриньо Ярошикни “Селтик”га сотиб юборди.
 
Ҳужумчилар: Андрей Шевченко

Украиналик ҳужумчини аслида Роман Абрамович сотиб олганди. “Милан”да даҳшатли ўйинларни кўрсатиб келган ҳужумчи “Челси”да буни аксини қилди. Худди Фернандо Торрес сингари ўзига сарфланган маблағларни оқламади. Айтиш керакки, бу трансфер ҳалигача клубнинг энг омадсиз трансфери бўлиб келмоқда. Эътибор қилинг, “Милан”да 296 марта майдонга тушган Шевченко 173 марта гол урганди. “Челси”да ўтган 2,5 йилда эса 9 бор гол урди. Мана сизга ҳужумчининг сермаҳсуллиги.
 
Клаудио Писарро

“Бавария”да етакчи ҳужумчи бўлган Писсаро “Челси”да бир мавсум ўйнади холос. Бу вақт ичида эса 2 маротаба гол урди. Унгача мюнхенликлар таркибида 330та учрашувда 138 марта дарвозани ишғол қилган эди. Кейинчалик ишлари юришмаган Писарро яна Бундеслигага қайтишга мажбур бўлади.
 
Матей Кежман

Дрогба билан ажойиб тандем ҳосил қилиши кутилган Кежман лондонликларга 5 миллион фунтга тушганди.ПСВда ёрқин ўйинларни намойиш қилиб, сербиядан ҳам мана шундай зўр тўпурар футболчилар борлигини кўрсатган Кежман “аристократлар”да буни эплай олмади. Моуриньо ҳар қанча унга имконият тақдим қилмасин, бош мураббийнинг тактикасига футболчи мос тушмади.
 
Иззатбек Абдуваҳобов тайёрлади.