«Динамо» - «Сўғдиёна» (2:0) учрашувидан сўнг «Сўғдиёна» бош мураббийи Даврон Файзиев ўйиндан кейинги фикрлари билан ўртоқлашди.

- Ўйинга яхши тайёргарлик кўриб, фақат ғалабани кўзлаб Самарқандга келгандик. Афсуски бугун омадимиз келмади. Баҳс кескин курашларга бой ўтди. Омад «Динамо» томонида бўлди. Улар вазиятларни голга айлантира олишди, биз эса йўқ. Ҳозир кийиниш хонасида йигитларга танбеҳ бердим. Улар иккита ғалабадан сўнг шогирдларим «еттинчи осмон»га учишди. Жамоам рақибни менсимагандек ўйин кўрсатди. Аммо, майдонда бор куч билан ҳаракат қилди.

- Иккинчи гол «Сўғдиёна» футболчилар ва мураббийларининг норозилигига сабаб бўлди. Вазиятни такроран кўрдингиз. Хулоса қандай?

- Бизга яққол ўйиндан ташқари ҳолатдек кўринганди. Вазиятларни такроран кўрдик. Аслида ҳимоячимиз ортда қолиб кетган экан. «Офсайд»дек кўринди ва шу боис қизишиб кетдим. Голни ҳаққоний киритилган, эътироз йўқ.