УЕФА Днепропетровскнинг “Днепр” футбол жамоаси ўйинчилари Европа Лигаси ярим финалининг “Наполи”га қарши жавоб учрашувида қўпол ўйнаганлари ва мухлисларнинг ножоиз хатти-ҳаракатлари учун жамоага қарши интизомий иш очди. Бу ҳақда УЕФА сайтида маълум қилинмоқда.
Интизом қоидаларига кўра, бир жамоа ўйинчиларига ўйин давомида 5 тадан кўп сариқ карточка кўрсатилса, интизомий иш очилади. “Днепр” ўйинчилари эса ушбу ўйинда 6 та сариқ карточка билан “сийланишди”.
УЕФА, шунингдек, ўйиндан кейин жамоа мухлисларининг майдонга югуриб чиқиб кетганлари, ирқчилик кайфиятидаги баннерлар кўрсатилгани, файерлар улоқтириш, тартибсизликлар ҳамда ўйинни қабул қилаётган томоннинг ташкилий ишларни яхши йўлга қўймаганига ўз эътиборини қаратди.
Ушбу ҳолат юзасидан УЕФА интизом қўмитаси 21 майда қарор қабул қилади.
