Кеча Сербия биринчи лигасида 29-тур учрашувлари бўлиб ўтди.

Хабарингиз бор, ҳамюртимиз Ҳусниддин Ғофуров ўтган мавсум якунларига кўра Сербия супер лигасидан қуйига йўл олган Иваницанинг “Явор” жамоаси таркибида тўп сурмоқда. Ҳусниддиннинг жамоаси ушбу турда “Слобода” клуби меҳмони бўлди ва 0:0 ҳисобида дуранг ўйнаб қайтди. Шу тариқа иваницаликлар ҳисобидаги очколар сони сўнгги тур олдидан 58 тага етди ва жамоа келаси мавсумда супер лигада ўйнаш имконини деярли нақд қилиб қўйди.

Боиси ҳозирда мусобақа жадвалида “Металац” клуби “Явор”ни изма-из таъқиб қилиб келмоқда. Ушбу жамоа ҳозирда 55 очко жамғарган ва ҳамюртимизнинг жамоасидан атиги уч очкога ортда бормоқда. Мусобақа регламентига кўра биринчи лигада дастлабки 2 та ўринни банд этган жамоалар Супер лигага тўғридан-тўғри йўл олса, учунчи ўриндаги клуб юқори дивизиондаги 14-ўринни эгаллаган клуб билан ўтиш баҳсида ўйнаши лозим бўлади.

“Металац”нинг сўнгги – 30-турда мусобақа жадвали карвонбошиси “Радник” меҳмони бўлишини инобатга олсак, “Явор”нинг иккинчи ўринни эгллаш учун ажойиб имкони бор.

Сўнгги тур учрашувлари 23-май куни ўтказилади. “Явор” бу гал “Моравац Орион”га қарши ўз уйида ўйнайди. Умид қиламизки, ушбу учрашув ҳамюртимиз клуби учун муваффақиятли кечади ва “Явор” тўғридан-тўғри Супер лигага чиқиш имкониятига эга бўлади!