Матбуот анжуманинг иккинчи қисмида журналистларнинг саволларига “Навбаҳор” бош мураббийи Бахтиёр Ашурматовнинг дисквалификация муддати якунланмаганлиги сабабли ёрдамчи мураббий Зоҳид Нурматов жавоб қайтарди:
- Ўйинга ўзинглар гувоҳ бўлдинглар, баҳс шиддатли тарзда ўтди. Майдонга фақат ғалабани кўзлаган ҳолда тушгандик. Гол уриш учун қулай имкониятларга ҳам эга бўлдик. Лекин, вазиятлардан фойдалана олмадик. Ўйлашимча, футболчиларимиз танаффусдан кейин ҳам худди биринчи бўлимдаги каби шиддатли руҳда ҳаракат қилишди. Биринчи бўлимда ҳисобни очганлигимиз сабабли йигитлар кучига куч қўшилди. Танаффусдан кейин эса рақиб ҳисобда олдинга чиқиб олганлиги боис бўшашмасдан ҳаракат қилиб, вазиятдан чиқиб кетишга интилишди.
Рақиб ўйини ҳақида гап кетганида, “Олмалиқ” жамоаси бугунги кундаги энг кучли клублардан бири саналади. Жамоа таркибидан маҳоратли футболчилар жой олишган. Буни исботи сифатида олмалиқликларни мусобақа жадвалида эгаллаб турган ўринни келтириб ўтиш мумкин. Жорий йилги чемпионатда юқори поғоналардан жой олишни ўзи бўлмаётганлигини барча кўриб турибди. Кейинги учрашувларда “Олмалиқ” жамоасига омад тилаб қоламан.
Умуман олганда футболчиларимиз ўйинни яхши бошлашганди. Лекин, танаффус арафасидаги ўтказиб юборилган гол қайсидир маънода жамоамиз аъзоларига таъсир кўрсатди. Шунга қарамай, ҳисобда ортда бораётган бўлишларига қарамай дурангни таъминлай олишди. Агарда меҳмонлар биринчи бўлим сўнггида гол уришмаганида, ўйин бошқача руҳда ўтган бўларди деб ўйлайман.
