Кеча Ўзбекистон кубоги 1/8 финал учрашувлари доирасидан ўрин олган “Локомотив” – “Навбаҳор” беллашуви ўтказилди.

Қисқа муддатли танаффусдан сўнг майдонга қайтган “Локомотив” ҳимоячиси Ислом Тўхтаҳўжаев “темирйўлчилар”нинг 2:0 ҳисобидаги ғалабалари билан якунига етган учрашув борасидаги фикрлари билан ўртоқлашди.

- Кечаги баҳс биз учун осон ўтгани йўқ. Боиси рақиб жамоа ҳам анчагина яхши шаклланганини кўрсатди.“Навбаҳор” етарлича қаршилик намойиш этди. Бироқ якунда омад бизга кулиб боқди. Бунга иккита асосий омилни кўрсата оламан. Биринчидан, биз ўз вақтида гол киритишни уддаладик. Иккинчидан эса наманганликлар сардорининг қизил карточка олиб майдонни тарк этиши ўйинга ўз таъсирини кўрсатмай қолмади. Биз яратилган вазиятларимизни голга айлантира олдик ва учрашувни ўз фойдамизга ҳал этишни уддаладик. Аммо шу билан барча масала ҳал, деб айтмаган бўлардим.Таъбир жоиз бўлса, ҳозирча ушбу тўқнашувнинг “биринчи бўлими” якунланди, холос. Ҳал қилувчи “иккинчи тайм” Наманганда бўлади. Энди биз ўша учрашувга жиддий ҳозирлик кўришимиз лозим бўлади.

Ўзим ҳақимда гапирадиган бўлсам, бир ойдан ошиқроқ муддат ўйнай олмадим. Ушбу танаффус қисқа муддатли бўлган бўлса ҳам барибир ўз сўзини айтди. Кечаги учрашув сўнггига борганда бироз толиққаним сезилди .Аммо бу тез орада ўтиб кетади, деб ўйлайман. Боиси машғулотларга киришганимга эндигина бир ҳафта бўлди. Ҳали ўз устимда қаттиқ ишлаб яна формамга қайтиб олишга ҳаракат қиламан, - дейди маҳоратли ҳимоячи SPORTS.uz интернет-портали мухбирига.